ڈپٹی کمشنر صحبت پور فریدہ ترین کا آدم پور اور داؤد کھیازئی کے اسکولوں کا دورہ، غیر حاضر ٹیچر معطل

صحبت پور: ڈپٹی کمشنر صحبت پور فریدہ ترین نے ڈسٹرکٹ ایجوکیشن آفیسر کے ہمراہ گورنمنٹ بوائز ہائی سکول آدم پور اور گورنمنٹ گرلز ہائی سکول داؤد کھیازئی کا تفصیلی دورہ کیا اور تعلیمی ماحول، تدریسی سرگرمیوں، اساتذہ کی حاضری، طلبہ کی کارکردگی اور صفائی ستھرائی کا جائزہ لیا۔ اسکول انتظامیہ اور اساتذہ نے تعلیمی سرگرمیوں اور درپیش مسائل پر بریفنگ دی۔

دورے کے دوران گورنمنٹ گرلز ہائی سکول داؤد کھیازئی میں ایک ٹیچر غیر حاضر پائی گئی جسے انکوائری کے لیے معطل کر دیا گیا اور آئندہ غیر حاضری سے اجتناب کی سختی سے تنبیہ کی گئی۔ ڈپٹی کمشنر نے آدم پور اسکول کی خستہ حال عمارت کی مرمت کی بھی ہدایت کی۔

فریدہ ترین نے کہا کہ سرکاری اسکولوں میں معیاری تعلیم کے ساتھ سازگار اور مثبت تعلیمی ماحول یقینی بنایا جائے، اور اساتذہ معاشرے کی تعمیر و ترقی میں بنیادی کردار ادا کرتے ہیں اس لیے وہ طلبہ کی علمی و اخلاقی تربیت پر خصوصی توجہ دیں۔

شجرکاری مہم کا افتتاح

ڈپٹی کمشنر نے گورنمنٹ بوائز ہائی سکول آدم پور کے احاطے میں پودا لگا کر شجرکاری مہم کا باقاعدہ افتتاح کیا۔ انہوں نے کہا کہ شجرکاری آنے والی نسلوں کے محفوظ مستقبل کے لیے اہم ذمہ داری ہے، درخت آلودگی کم کرنے، درجہ حرارت متوازن رکھنے اور موسمیاتی تبدیلی کے منفی اثرات کم کرنے میں اہم کردار ادا کرتے ہیں، اور صرف پودے لگانا کافی نہیں بلکہ ان کی دیکھ بھال بھی ضروری ہے۔

انہوں نے اساتذہ پر زور دیا کہ طلبہ کو شجرکاری اور ماحول دوست سرگرمیوں کے بارے میں آگاہی دیں، اور کہا کہ اگر ہر طالب علم ایک پودا لگانے اور اس کی حفاظت کی ذمہ داری لے تو سرسبز اور صحت مند معاشرے کے قیام میں نمایاں پیش رفت ممکن ہے۔

تصویر: بشکریہ ڈی جی پی آر بلوچستان