7ویں خواتین بلوچستان ووشو چیمپئن شپ اختتام پذیر، ڈاکٹر ربابہ خان بلیدی نے گولڈ میڈلز تقسیم کیے

کوئٹہ: صوبائی مشیر برائے محکمہ ترقیِ نسواں ڈاکٹر ربابہ خان بلیدی نے کہا ہے کہ بلوچستان کے نوجوان، خصوصاً ہماری بیٹیاں بے پناہ صلاحیتوں کی مالک ہیں اور کھیل کے میدانوں میں ان کی کامیابیاں بلوچستان ہی نہیں پاکستان کے لیے بھی باعثِ فخر ہیں۔

وہ 7ویں خواتین بلوچستان ووشو چیمپئن شپ 2026 کی اختتامی تقریب سے بطور چیف گیسٹ خطاب کر رہی تھیں۔ انہوں نے کہا کہ کھیل کے میدان نوجوانوں میں خوداعتمادی، نظم و ضبط، برداشت اور قیادت کی صلاحیتیں پیدا کرنے کا بہترین ذریعہ ہیں، اور بلوچستان کے نوجوان قومی و بین الاقوامی سطح پر پاکستان کا نام روشن کرنے کی بھرپور صلاحیت رکھتے ہیں۔

ڈاکٹر ربابہ خان بلیدی نے کہا کہ ہماری بیٹیاں کھیل میں کامیابیاں حاصل کر کے دنیا کے سامنے بلوچستان کی مثبت اور روشن تصویر پیش کر رہی ہیں اور ان کی حوصلہ افزائی و سرپرستی ہم سب کی ذمہ داری ہے۔ محکمہ ترقیِ نسواں خواتین اور بچیوں کی فلاح، حقوق کے تحفظ، تعلیم، صحت اور معاشرے میں باوقار کردار کے لیے مؤثر اقدامات کر رہا ہے، اور انہیں کھیلوں سمیت مختلف شعبوں میں یکساں مواقع دینا صوبائی حکومت کی ترجیح ہے۔

ووشو میں بچیوں کی بڑھتی شرکت

انہوں نے کہا کہ ووشو سمیت دیگر کھیلوں میں بلوچستان کی بچیوں کی بڑھتی ہوئی شرکت مثبت اور حوصلہ افزا رجحان ہے، اور اگر انہیں مناسب مواقع، تربیت اور سہولیات دی جائیں تو وہ بلوچستان کے ساتھ پاکستان کا نام بھی روشن کر سکتی ہیں۔ حکومت متعلقہ اداروں کے ساتھ مل کر خواتین اور بچیوں کے لیے مواقع پیدا کرنے کے اقدامات جاری رکھے گی۔

صوبائی مشیر نے کہا کہ کھیل صرف جسمانی صحت اور فٹنس کا ذریعہ نہیں بلکہ نوجوان نسل میں مثبت سوچ، خوداعتمادی، برداشت، نظم و ضبط اور آگے بڑھنے کا جذبہ پیدا کرتے ہیں۔ انہوں نے زور دیا کہ کھیلوں کے میدان مزید آباد کیے جائیں اور بیٹیوں کو صوبائی، قومی اور بین الاقوامی سطح پر صلاحیتیں منوانے کے لیے ہر ممکن سہولت دی جائے، کیونکہ صحت مند اور پراعتماد نوجوان ہی مضبوط، پرامن اور ترقی یافتہ بلوچستان کی بنیاد ہیں۔

تقریب میں ڈاکٹر ربابہ خان بلیدی کا پرتپاک استقبال کیا گیا۔ انہوں نے ووشو کھلاڑیوں کے فنون اور کھیل کے مظاہرے دیکھے اور نمایاں کارکردگی دکھانے والی کھلاڑیوں میں گولڈ میڈلز تقسیم کیے۔ انہوں نے چیمپئن شپ کے کامیاب انعقاد پر منتظمین، کوچز، کھلاڑیوں اور والدین کو مبارکباد دیتے ہوئے کہا کہ کھیل کے میدان آباد ہوں گے تو بلوچستان کے نوجوانوں کا مستقبل روشن ہوگا۔

تصویر: بشکریہ ڈی جی پی آر بلوچستان