1991 کی آسامیوں کی تقسیم پالیسی پر نظرثانی: میر شعیب نوشیروانی کی زیر صدارت ریڈسٹریبیوشن آف پوسٹس کمیٹی کا اجلاس

کوئٹہ: صوبائی وزیرِ خزانہ و معدنیات اور چیئرمین ریڈسٹریبیوشن آف پوسٹس کمیٹی میر شعیب نوشیروانی کی زیرِ صدارت اجلاس منعقد ہوا، جس میں سیکرٹری قانون پرویز نوشیروانی، اسپیشل سیکرٹری ایس اینڈ جی اے ڈی (S&GAD) حبیب الرحمن کاکڑ اور محکمہ خزانہ کے ٹیکنیکل نمائندوں نے شرکت کی۔

اجلاس میں 1991 میں وضع کی گئی آسامیوں کی تقسیم کی پالیسی کا تفصیلی جائزہ لیا گیا اور نئے ڈویژنز اور اضلاع کے قیام کے بعد موجودہ انتظامی ڈھانچے اور آسامیوں کی تقسیم کے حوالے سے صوبائی وزیر خزانہ کو بریفنگ دی گئی۔ نئے قائم ہونے والے ڈویژنز اور اضلاع کو مدنظر رکھتے ہوئے پالیسی پر نظرثانی اور ضرورت کے مطابق اس میں ترامیم پر غور کیا گیا۔

میر شعیب نوشیروانی نے کہا کہ آسامیوں کی تقسیم کے لیے شفافیت، میرٹ اور آبادی کے تناسب کو مدنظر رکھ کر بنیادی پالیسی وضع ہونی چاہیے۔ حکومت کی روزِ اول سے کوشش ہے کہ تمام ڈویژنز اور اضلاع کو ان کی ضروریات اور آبادی کے تناسب کے مطابق مناسب مواقع فراہم کیے جائیں، تاکہ سرکاری وسائل اور ملازمتوں کی تقسیم میں انصاف اور توازن برقرار رہے۔ انہوں نے متعلقہ حکام کو پالیسی پر نظرثانی کا عمل مؤثر انداز میں اور بروقت مکمل کرنے کی ہدایت کی۔

تصویر: بشکریہ ڈی جی پی آر بلوچستان