یونیورسٹی آف لورالائی کے وائس چانسلر ڈاکٹر احسان اللہ کاکڑ کو تمغہ امتیاز ملنے پر کیمپس میں تقریب

لورالائی: یونیورسٹی آف لورالائی کے وائس چانسلر انجینئر پروفیسر ڈاکٹر احسان اللہ کاکڑ کو شعبہ تعلیم میں نمایاں خدمات کے اعتراف میں تمغہ امتیاز ملنے پر یونیورسٹی کیمپس میں پروقار تقریب منعقد ہوئی جس میں فیکلٹی ممبران، انتظامی افسران، ملازمین اور طلبہ نے بھرپور شرکت کی۔

تقریب میں وائس چانسلر نے کیک کاٹا، جبکہ اساتذہ، افسران، ملازمین اور طلبہ نے انہیں دلی مبارکباد پیش کی اور یادگاری تحائف دیے۔ شرکاء نے کہا کہ یہ اعزاز نہ صرف ڈاکٹر احسان اللہ کاکڑ کی ذاتی و پیشہ ورانہ کامیابی ہے بلکہ یونیورسٹی آف لورالائی، ضلع لورالائی اور بلوچستان کے لیے بھی باعثِ فخر ہے، اور قومی سطح پر یہ اعزاز حاصل کرنا نوجوان نسل کے لیے قابلِ تقلید مثال ہے۔

مقررین نے کہا کہ تعلیم کسی بھی معاشرے کی ترقی کی بنیاد ہے اور ڈاکٹر احسان اللہ کاکڑ نے نوجوانوں کو بہتر تعلیمی مواقع فراہم کرنے اور اعلیٰ تعلیم کے فروغ میں اہم کردار ادا کیا ہے؛ ان کی قیادت میں یونیورسٹی کا تعلیمی و انتظامی معیار بہتر بنانے کے لیے مختلف اقدامات جاری ہیں۔

وائس چانسلر نے فیکلٹی، افسران، ملازمین اور طلبہ کا شکریہ ادا کرتے ہوئے کہا کہ یہ اعزاز ان تمام افراد کی محنت اور تعاون کا بھی اعتراف ہے جو تعلیم کے فروغ اور یونیورسٹی کی ترقی کے لیے کردار ادا کر رہے ہیں، اور وہ آئندہ بھی نوجوانوں کو معیاری تعلیم اور بہتر مواقع کی فراہمی کے لیے اپنی ذمہ داریاں بھرپور انداز میں ادا کرتے رہیں گے۔

تصویر: بشکریہ ڈی جی پی آر بلوچستان