گورنمنٹ گرلز ڈگری کالج گوادر میں یونیورسٹی آف گوادر کی الحاق کمیٹی کا اجلاس، سہولیات تسلی بخش قرار

گوادر: ڈویژنل مانیٹرنگ آفیسر کالجز مکران ڈویژن پروفیسر برکت اسماعیل نے گورنمنٹ گرلز ڈگری کالج گوادر کا دورہ کیا، جہاں انہوں نے تعلیمی سرگرمیوں، تدریسی عمل، طالبات کی حاضری اور کالج میں دستیاب تعلیمی و بنیادی سہولیات کا جائزہ لیا۔

انہوں نے فرسٹ ایئر کی کلاس کا معائنہ کیا اور طالبات سے مختلف موضوعات پر سوال و جواب کیے۔ طالبات کی علمی صلاحیت اور فعال شرکت کو سراہتے ہوئے انہوں نے زور دیا کہ وہ محنت، تحقیق اور عملی سیکھنے کو ترجیح دیں، کیونکہ سوال کرنا سیکھنے کے عمل کا اہم حصہ ہے اور اس سے تحقیق، جستجو اور تنقیدی سوچ کو فروغ ملتا ہے۔

الحاق کمیٹی کا معائنہ

بعد ازاں کالج میں یونیورسٹی آف گوادر کی الحاق کمیٹی کا اجلاس ہوا جس میں پروفیسر برکت اسماعیل، رجسٹرار یونیورسٹی آف گوادر دولت خان، میڈم رابعہ اسلم، پروفیسر رحیم مہر اور دیگر افسران و اساتذہ شریک ہوئے، جبکہ کالج کی پرنسپل پروفیسر سبین بلوچ بھی موجود تھیں۔ اجلاس میں کالج کے یونیورسٹی آف گوادر سے الحاق کے امور کا جائزہ لیا گیا اور کالج کی تعلیمی، انتظامی و بنیادی سہولیات پر بریفنگ دی گئی۔

کمیٹی ارکان نے سائنس و کمپیوٹر لیبارٹریز، لائبریری، کلاس رومز اور زیرِ تعمیر عمارت کا معائنہ کیا اور دستیاب سہولیات اور جاری تعلیمی سرگرمیوں کو تسلی بخش قرار دیتے ہوئے طالبات کے لیے معیاری اعلیٰ تعلیم کے مواقع مزید مؤثر بنانے پر زور دیا۔

پروفیسر برکت اسماعیل نے کالج انتظامیہ اور تدریسی عملے کی کاوشوں کو سراہا اور کہا کہ طالبات کو معیاری تعلیم، جدید علمی تقاضوں اور عملی مہارتوں سے آراستہ کرنا تعلیمی اداروں کی بنیادی ذمہ داری ہے، اور تحقیق، تخلیقی صلاحیت، سوال کرنے کی عادت اور عملی علم کے فروغ سے انہیں مستقبل کے چیلنجز کے لیے بہتر طور پر تیار کیا جا سکتا ہے۔

تصویر: بشکریہ ڈی جی پی آر بلوچستان