گورنمنٹ گرلز ڈگری کالج گوادر میں 62 طالبات کے لیے چار روزہ پیشہ ورانہ و قائدانہ تربیتی پروگرام

گوادر: بلوچستان یوتھ ڈویلپمنٹ پروگرام اور محکمہ امورِ نوجوانان حکومتِ بلوچستان کے زیرِ اہتمام گورنمنٹ گرلز ڈگری کالج گوادر میں طالبات کی پیشہ ورانہ، قائدانہ اور عملی صلاحیتیں اجاگر کرنے کے لیے چار روزہ جامع تربیتی پروگرام منعقد کیا گیا، جس میں 62 سے زائد طالبات نے شرکت کی۔

یہ اقدام وزیر اعلیٰ بلوچستان میر سرفراز احمد بگٹی کی قیادت اور وزیر اعلیٰ کی مشیر برائے کھیل و امورِ نوجوانان مینا مجید بلوچ کی رہنمائی میں نوجوانوں، بالخصوص طالبات کو تعلیم کے ساتھ عملی، پیشہ ورانہ اور روزگار سے متعلق مہارتیں فراہم کرنے کے حکومتی وژن کا حصہ ہے۔

ورکشاپ کے پہلے روز ڈاکٹر عبدالماجد ناصر نے ابلاغ اور باہمی روابط کی مہارتوں پر تربیت دی، دوسرے روز قرۃ العین نے قائدانہ اور انتظامی صلاحیتوں پر عملی سیشن منعقد کیا، جبکہ تیسرے اور چوتھے روز ڈاکٹر غلام جان کی نگرانی میں کاروباری صلاحیتوں، کیریئر کاؤنسلنگ، سی وی رائٹنگ اور فرضی انٹرویوز پر تربیت دی گئی۔

تربیت کے دوران طالبات کو عملی زندگی کے چیلنجز کا مؤثر سامنا کرنے، صلاحیتیں بہتر بنانے، روزگار کے مواقع سے فائدہ اٹھانے اور مستقبل کے لیے پیشہ ورانہ تیاری کے بارے میں رہنمائی دی گئی۔ ورکشاپ میں زور دیا گیا کہ نوجوانوں، خصوصاً خواتین کو معیاری تعلیم کے ساتھ جدید مہارتیں، پیشہ ورانہ رہنمائی اور روزگار و کاروبار کے مواقع فراہم کرنا صوبائی حکومت کی اہم ترجیحات میں شامل ہے اور ایسے پروگرام نوجوانوں میں خود اعتمادی، قیادت اور خود انحصاری کو فروغ دے رہے ہیں۔

تصویر: بشکریہ ڈی جی پی آر بلوچستان