گورنمنٹ گرلز انٹر کالج سربندن میں طالبات میں درسی کتب کے 18 سیٹ تقسیم

گوادر: صوبائی حکومت کی علم دوست پالیسی اور تعلیم کے فروغ کے عزم کے تحت گورنمنٹ گرلز انٹر کالج سربندن میں ایک سادہ مگر پروقار تقریب میں طالبات میں درسی کتب تقسیم کی گئیں، جس کا مقصد طالبات کو تعلیمی سہولیات اور یکساں تعلیمی مواقع فراہم کرنا ہے۔

کالج انتظامیہ کے مطابق ضلعی محکمۂ تعلیم کی جانب سے 8 سیٹ درسی کتب فراہم کیے گئے، جبکہ مزید 10 سیٹ کالج انتظامیہ کی خصوصی کاوشوں سے حاصل ہوئے، یوں مجموعی طور پر 18 سیٹ دستیاب ہوئے۔ طالبات کی تعداد کتابوں سے زیادہ ہونے کے باعث تقسیم میرٹ، تعلیمی کارکردگی اور ضرورت کو مدنظر رکھ کر کی گئی، اور مزید کتابیں دستیاب ہونے پر باقی طالبات کو بھی مرحلہ وار فراہم کی جائیں گی۔

پرنسپل عبداللہ نے کہا کہ صوبائی حکومت کی علم دوست پالیسی کا مقصد تعلیمی اداروں میں بہتر ماحول اور معیاری تعلیمی سہولیات کی فراہمی ہے۔ انہوں نے طالبات سے کہا کہ انٹرمیڈیٹ کے دو سال ان کے مستقبل کے لیے انتہائی اہم ہیں، وہ کتابوں اور اساتذہ کی رہنمائی سے بھرپور استفادہ کریں، کیونکہ محنت، مستقل مزاجی، نظم و ضبط اور لگن کامیابی کی بنیادی شرائط ہیں۔

تصویر: بشکریہ ڈی جی پی آر بلوچستان