گورنر جعفر خان مندوخیل: کوئٹہ میں پہلی ڈیجیٹل انٹرپرینیورشپ ’وان ایٹ‘ کا قیام احسن اقدام

کوئٹہ: گورنر بلوچستان جعفر خان مندوخیل نے کہا ہے کہ صوبائی دارالحکومت کوئٹہ میں پہلی انٹرپرینیورشپ وان ایٹ (Won-it) کا قیام ایک احسن اقدام ہے۔ وان ایٹ دراصل جدید ڈیجیٹل تجارتی رجحانات سے ہم آہنگ ہونے، کاروبار کے نت نئے طریقے اختیار کرنے اور معاشی خودمختاری یقینی بنانے کے لیے ایک منفرد ڈیجیٹل انٹرپرینیورشپ پلیٹ فارم ہے۔

گورنر نے یہ بات بیوٹمز یونیورسٹی میں ڈیجیٹل انٹرپرینیورشپ وان ایٹ کے زیر اہتمام پروگرام میں گفتگو کرتے ہوئے کہی۔ انہوں نے کہا کہ اس کا مقصد باصلاحیت نوجوانوں کے نئے بزنس آئیڈیاز اور اسٹارٹ اپس کو ایسا قومی پلیٹ فارم فراہم کرنا ہے جہاں وہ اپنے کاروباری خیالات پیش کریں، ماہرین سے رہنمائی حاصل کریں اور اپنے خوابوں کو حقیقت میں بدلنے کے لیے بزنس گرانٹس حاصل کر سکیں۔ اس ضمن میں چیئرمین وان ایٹ پرنس آغا عمر احمدزئی اور ان کی پوری ٹیم کی کوششیں خراجِ تحسین کی مستحق ہیں۔

پروگرام کے تمام فائنلسٹس نے ایک دلچسپ اور مسابقتی پچ شو میں اپنے کاروباری تصورات پیش کیے، جنہیں گورنر بلوچستان نے لائقِ تحسین قرار دیا۔ اس موقع پر پارلیمانی سیکرٹری برائے بہبود آبادی پرنس آغا عمر احمدزئی، بیوٹمز یونیورسٹی کے وائس چانسلر ڈاکٹر خالد حفیظ، پرو وائس چانسلر ڈاکٹر میروایس کاسی، وان ایٹ کے چیف ایگزیکٹو آفیسر عمر اجمل اور یونیورسٹی کے فیکلٹی ممبران موجود تھے۔

نوجوانوں کے لیے سرمایہ، رہنمائی اور نیٹ ورکنگ

گورنر جعفر خان مندوخیل نے کہا کہ ڈیجیٹل انٹرپرینیورشپ وان ایٹ کے قیام کا مقصد بلوچستان میں نئے تجارتی رجحانات اور انٹرپرینیورشپ کو فروغ دینا، نوجوانوں کے جدید کاروباری آئیڈیاز کو قومی سطح پر نمایاں کرنا، اسٹارٹ اپس کو سرمایہ، رہنمائی اور نیٹ ورکنگ کے مواقع فراہم کرنا اور معاشی خود انحصاری کی حوصلہ افزائی کرنا ہے۔ ان نئے رجحانات کو متعارف کرانے سے بلوچستان کا مثبت، باصلاحیت اور ترقی پسند امیج دنیا کے سامنے پیش کرنے میں مدد ملے گی۔

انہوں نے کہا کہ صوبے کے نوجوان پوشیدہ صلاحیتوں میں کسی سے کم نہیں، اس لیے ضروری ہے کہ انہیں تمام ضروری مواقع اور سہولیات فراہم کی جائیں۔ ڈیجیٹل انٹرپرینیورشپ کے قیام کے بعد باصلاحیت نوجوانوں کو چاہیے کہ وہ اپنی صلاحیتوں میں نکھار پیدا کرنے، انفرادی سطح پر اپنا کاروبار شروع کرنے اور معاشی طور پر خودمختار بننے کے مساوی مواقع سے بھرپور استفادہ کریں، اس طرح وہ اپنے خوابوں کو حقیقت میں بدلنے کے قابل ہو جائیں گے۔

تصویر: بشکریہ ڈی جی پی آر بلوچستان