گوادر: ڈی ایچ او ڈاکٹر یاسر طاہر کا بی ایچ یو فقیر آباد اور سول ڈسپنسری ہر بیلار کا دورہ، ادویات فراہم

گوادر: وزیر اعلیٰ بلوچستان میر سرفراز بگٹی کے وژن کے تحت صوبے کے دور دراز علاقوں میں عوام کو معیاری، بروقت اور موثر طبی سہولیات کی فراہمی کے لیے حکومت بلوچستان عملی اقدامات کر رہی ہے۔ اسی سلسلے میں ڈسٹرکٹ ہیلتھ آفیسر گوادر ڈاکٹر یاسر طاہر نے ڈپٹی ڈسٹرکٹ ہیلتھ آفیسر ڈاکٹر فاروق بلوچ کے ہمراہ بنیادی مرکز صحت (بی ایچ یو) فقیر آباد اور سول ڈسپنسری ہر بیلار کا تفصیلی دورہ کیا۔

دورے کے دوران ڈسٹرکٹ ہیلتھ آفیسر نے طبی عملے کی حاضری، ادویات کے دستیاب ذخیرے، مریضوں کو فراہم کی جانے والی طبی سہولیات اور مجموعی انتظامی امور کا جائزہ لیا۔ انہوں نے دونوں مراکز صحت میں ضروری ادویات کی دستیابی یقینی بنانے کے لیے مزید ادویات بھی فراہم کیں اور عملے کو ہدایت کی کہ عوام کو معیاری اور بروقت طبی خدمات کی فراہمی میں کسی قسم کی کوتاہی برداشت نہیں کی جائے گی۔

ڈاکٹر یاسر طاہر نے توسیعی پروگرام برائے حفاظتی ٹیکہ جات (EPI) کے مرکز کا بھی معائنہ کیا، جہاں بچوں کی ویکسینیشن کے ریکارڈ، کولڈ چین سسٹم اور فیلڈ میں حفاظتی ٹیکہ جات کی کوریج کا جائزہ لیا گیا۔ انہوں نے ہدایت کی کہ ہر بچے تک حفاظتی ٹیکہ جات کی بروقت رسائی یقینی بنائی جائے اور معمول کی ویکسینیشن مہم کو مزید موثر اور فعال بنایا جائے تاکہ بچوں کو قابلِ انسداد بیماریوں سے محفوظ رکھا جا سکے۔

اس موقع پر انہوں نے کہا کہ وزیر اعلیٰ میر سرفراز بگٹی کی قیادت میں حکومت بلوچستان شعبۂ صحت کی بہتری، بنیادی مراکز صحت کی فعالیت، ادویات کی بلاتعطل فراہمی، حفاظتی ٹیکہ جات کے نظام کو مزید موثر بنانے اور عوام کو ان کی دہلیز پر معیاری طبی سہولیات فراہم کرنے کے لیے بھرپور اقدامات کر رہی ہے۔ انہوں نے عزم ظاہر کیا کہ ضلع گوادر کے تمام صحت مراکز کی باقاعدہ نگرانی، شفاف مانیٹرنگ اور عوامی خدمت کے معیار کو بہتر بنانے کا عمل جاری رکھا جائے گا۔

تصویر: بشکریہ ڈی جی پی آر بلوچستان