گوادر ڈگری کالج میں فرسٹ ایئر طلبہ کے لیے ویلکم پارٹی، ڈاکٹر ماہ نور برکت کی کیریئر رہنمائی

گوادر: گورنمنٹ بوائز ڈگری کالج گوادر میں فرسٹ ایئر کے طلبہ کے اعزاز میں ویلکم پارٹی اور کیریئر کونسلنگ سیشن منعقد ہوا، جس کی مہمانِ خصوصی اسسٹنٹ کمشنر اورماڑہ ڈاکٹر ماہ نور برکت تھیں۔

پرنسپل پروفیسر نصیر احمد نے طلبہ کو خوش آمدید کہتے ہوئے تعلیم، نظم و ضبط اور محنت کی اہمیت پر زور دیا۔

ڈاکٹر ماہ نور برکت نے طلبہ سے خطاب میں اپنے تعلیمی و پیشہ ورانہ تجربات بیان کیے اور اعلیٰ تعلیم، کیریئر کے مواقع اور مقابلے کے امتحانات سے متعلق رہنمائی فراہم کی۔ انہوں نے طلبہ پر زور دیا کہ وہ واضح اہداف مقرر کرکے مستقل مزاجی اور محنت سے اپنا مستقبل روشن بنائیں۔ تقریب میں فرسٹ ایئر کے طلبہ نے بھرپور شرکت کی اور کالج انتظامیہ نے نئے طلبہ کے لیے نیک خواہشات کا اظہار کیا۔

تصویر: بشکریہ ڈی جی پی آر بلوچستان