گوادر میں نرسنگ کالج کے قیام کی جانب پیش رفت، محکمہ صحت کی ٹیم نے مجوزہ عمارت موزوں قرار دے دی

گوادر: رکن صوبائی اسمبلی گوادر مولانا ہدایت الرحمن بلوچ کی جانب سے گوادر میں نرسنگ کالج کے قیام کے لیے جاری کوششوں میں اہم پیش رفت سامنے آئی ہے۔ محکمہ صحت بلوچستان کی ٹیم نے ان کے ہمراہ نرسنگ کالج کے لیے مجوزہ عمارت اور جگہ کا تفصیلی دورہ کرکے مختلف پہلوؤں کا جائزہ لیا۔

مولانا ہدایت الرحمن بلوچ کے مطابق انہوں نے گوادر کے عوام کو صحت کے شعبے میں بہتر سہولیات کی فراہمی اور بالخصوص مقامی نوجوانوں کے لیے طبی تعلیم و تربیت کے مواقع پیدا کرنے کے لیے نرسنگ کالج کے قیام کا معاملہ محکمہ صحت کے حکام کے سامنے پیش کیا تھا، جس کے سلسلے میں ٹیم نے گوادر کا دورہ کیا۔

چیف پلاننگ آفیسر محکمہ صحت بلوچستان نوید احمد رئیسانی، سیکشن آفیسر شئے مرید بلوچ اور ڈسٹرکٹ ہیلتھ آفیسر سمیت متعلقہ حکام نے عمارت کی دستیابی، گنجائش اور دیگر ضروری امور کا جائزہ لیا، اور حکام کے مطابق مجوزہ عمارت نرسنگ کالج کے لیے موزوں قرار دی گئی ہے۔ ٹیم اپنی رپورٹ سیکریٹری صحت بلوچستان کو پیش کرے گی، جس کے بعد مزید کارروائی عمل میں لائی جائے گی۔

رکن صوبائی اسمبلی نے کہا کہ عوام کو معیاری صحت کی سہولیات اور مقامی نوجوانوں کو صحت کے شعبے میں تعلیم و تربیت کے مواقع فراہم کرنا ان کی ترجیحات میں شامل ہے۔ نرسنگ کالج نہ صرف مقامی نوجوانوں کے لیے پیشہ ورانہ تعلیم کے نئے مواقع پیدا کرے گا بلکہ مستقبل میں ضلع گوادر اور گردونواح کے طبی مراکز کے لیے مقامی تربیت یافتہ نرسنگ اسٹاف کی دستیابی میں بھی معاون ثابت ہوگا۔

تصویر: بشکریہ ڈی جی پی آر بلوچستان