کوئٹہ: ڈسٹرکٹ کمپنسیشن کمیٹی کا اجلاس، پٹیل روڈ واقعے کے متاثرین کے معاوضہ کیسز کا جائزہ

کوئٹہ: ایڈیشنل ڈپٹی کمشنر (جنرل) کوئٹہ محمد انور کاکڑ کی زیرِ صدارت ڈسٹرکٹ کمپنسیشن کمیٹی کا اجلاس منعقد ہوا، جس میں کوئٹہ میں حال ہی میں پیش آنے والے مختلف واقعات، خصوصاً پٹیل روڈ کے واقعے، پر تفصیلی غور کیا گیا۔

اجلاس کے دوران متاثرہ واقعات سے متعلق جانچ پڑتال، رپورٹس اور معاوضے کے کیسز کا جائزہ لیا گیا۔ ایڈیشنل ڈپٹی کمشنر (جنرل) نے متعلقہ اداروں کو ہدایت کی کہ زیرِ التوا رپورٹس جلد از جلد مکمل کرکے جمع کرائی جائیں تاکہ متاثرہ خاندانوں کے معاوضے کے کیسز میں مزید تاخیر نہ ہو۔

انہوں نے بعض اداروں کی جانب سے بروقت رپورٹس فراہم نہ کرنے پر برہمی کا اظہار کیا اور متعلقہ حکام کو سختی سے ہدایت کی کہ آئندہ تمام رپورٹس مقررہ وقت کے اندر جمع کرائی جائیں۔

اجلاس میں سی ٹی ڈی، سول ہسپتال، بی ایم سی ہسپتال، میٹروپولیٹن کارپوریشن، ایگری کلچر انجینئرنگ اور دیگر متعلقہ اداروں کے نمائندوں نے شرکت کی۔

تصویر: بشکریہ ڈی جی پی آر بلوچستان