کوئٹہ میں 12 ربیع الاول کے انتظامات کا جائزہ؛ ڈی سی مہراللہ بادینی کی فول پروف سکیورٹی کی ہدایت

کوئٹہ: 12 ربیع الاول کی تیاریوں، سکیورٹی انتظامات اور دیگر امور کا جائزہ لینے کے لیے ڈپٹی کمشنر کوئٹہ مہراللہ بادینی کی زیرِ صدارت اجلاس منعقد ہوا جس میں ڈپٹی کمشنر (ویسٹ) منیر احمد درانی سمیت تمام متعلقہ محکموں کے افسران، جماعت اہلسنت کے عہدیداران، علماء کانفرنس اور دیگر نمائندگان نے شرکت کی۔

اجلاس میں صفا کوئٹہ، میٹروپولیٹن کارپوریشن کوئٹہ (MCQ)، پی ڈی ایم اے، کیسکو، سوئی گیس، پولیس، ایف سی، محکمہ صحت (DHO) اور دیگر اداروں کے نمائندے شریک ہوئے۔ شرکاء کو 12 ربیع الاول کے جلوس و مجالس کے روٹس، صفائی ستھرائی، سکیورٹی، بجلی کی فراہمی اور شہر میں روشنی کے انتظامات پر تفصیلی بریفنگ دی گئی۔

ڈپٹی کمشنر نے ہدایت کی کہ مجالس اور جلوس کے تمام روٹس پر صفائی کے خصوصی انتظامات کیے جائیں، تمام مجالس کے مقامات پر بجلی کی بلاتعطل فراہمی یقینی بنائی جائے اور شہر و اہم شاہراہوں پر لائٹس کی تنصیب و مرمت مکمل کی جائے۔

انہوں نے سکیورٹی اداروں کو 12 ربیع الاول کے تمام پروگرامز کے لیے فول پروف سکیورٹی پلان پر عملدرآمد یقینی بنانے کی ہدایت کی اور کہا کہ ٹریفک مینجمنٹ، ایمرجنسی رسپانس اور طبی سہولیات سمیت دیگر انتظامات کو بھی مربوط بنایا جائے۔ ڈپٹی کمشنر نے کہا کہ اس موقع پر امن و امان، صفائی، سکیورٹی اور شہری سہولیات میں کوئی کوتاہی برداشت نہیں ہوگی اور تمام ادارے باہمی رابطے سے فرائض انجام دیں۔

دریں اثنا ڈپٹی کمشنر (ویسٹ) کوئٹہ منیر احمد درانی نے اپنے عہدے کا چارج سنبھال کر فرائض کی ادائیگی شروع کر دی ہے۔

تصویر: بشکریہ ڈی جی پی آر بلوچستان