کوئٹہ: بلوچستان ریونیو اتھارٹی میں چیئرپرسن عبداللہ خان کی زیرصدارت آڈٹ کارروائیوں کا جائزہ اجلاس

کوئٹہ: بلوچستان ریونیو اتھارٹی (BRA) میں چیئرپرسن عبداللہ خان کی زیرِ صدارت ایک اجلاس منعقد ہوا، جس میں آڈٹ کارروائیوں کا جائزہ لینے، آڈٹ نظام کو مزید موثر بنانے اور صوبائی محصولات میں موجود ممکنہ فرق کی نشاندہی سے متعلق امور پر غور کیا گیا۔

اجلاس میں آڈٹ کے عمل کو مزید مضبوط بنانے، ٹیکس قوانین پر موثر عملدرآمد یقینی بنانے اور محصولات کی وصولی میں موجود خامیوں اور ممکنہ کمی کی نشاندہی کے لیے مربوط حکمتِ عملی اپنانے پر زور دیا گیا۔

اس موقع پر اس امر پر توجہ دی گئی کہ آڈٹ کارروائیوں کو موثر، شفاف اور نتائج پر مبنی بنایا جائے تاکہ ٹیکس دہندگان کی جانب سے درست ٹیکس رپورٹنگ کو یقینی بنانے، عدم تعمیل کی نشاندہی کرنے اور واجب الادا محصولات کی وصولی بہتر بنانے میں مدد مل سکے۔

چیئرپرسن نے آڈٹ نظام کو مزید مستحکم بنانے اور محصولات کے فرق کی نشاندہی کے لیے متعلقہ افسران کی مربوط کوششوں کی اہمیت پر زور دیا۔ انہوں نے ہدایت کی کہ دستیاب معلومات اور ریکارڈ کو موثر انداز میں بروئے کار لاتے ہوئے ٹیکس قوانین کے مطابق کارروائیوں کو آگے بڑھایا جائے۔

بلوچستان ریونیو اتھارٹی صوبے میں ٹیکس تعمیل کو بہتر بنانے، محصولات کے ممکنہ نقصانات کی نشاندہی اور ٹیکس انتظامیہ کی کارکردگی موثر بنانے کے لیے اقدامات جاری رکھے ہوئے ہے۔