کمشنر لسبیلہ سائرہ عطاء کا گڈانی میں سنرجیکو ریفائنری پلانٹ کا دورہ، سکیورٹی اور CSR پر زور

حب: کمشنر لسبیلہ ڈویژن سائرہ عطاء نے تحصیل گڈانی میں قائم پاکستان کی معروف پٹرولیم ریفائننگ و مارکیٹنگ کمپنی Cnergyico Pk Limited (CPL) کے پلانٹ کا دورہ کیا، جہاں کمپنی انتظامیہ نے ان کا اور وفد کا استقبال کیا۔

کمپنی انتظامیہ نے تفصیلی بریفنگ اور پریزنٹیشن میں کمپنی کی سرگرمیوں، پٹرولیم ریفائننگ کے عمل، جاری منصوبوں، صنعتی ترقی میں کردار اور خطے کی معیشت میں تعاون سے آگاہ کیا۔ ملاقات میں سکیورٹی، کارپوریٹ سوشل ریسپانسبلٹی (CSR)، مقامی آبادی کی فلاح و بہبود اور ضلعی انتظامیہ و کمپنی کے درمیان رابطہ کاری پر تبادلہ خیال ہوا۔

کمشنر نے صنعتی تنصیبات کی سکیورٹی مزید مؤثر بنانے اور ضلعی انتظامیہ، پولیس اور دیگر اداروں کے ساتھ قریبی رابطہ رکھنے کی ضرورت پر زور دیا۔ انہوں نے ہدایت کی کہ وزیر اعلیٰ بلوچستان سرفراز بگٹی اور چیف سیکرٹری شکیل قادر خان کے وژن کے تحت CSR پروگرامز میں مقامی آبادی کی فلاح، بالخصوص تعلیم، صحت، ہنرمندی اور دیگر سماجی شعبوں میں مؤثر اقدامات کیے جائیں۔

کمشنر لسبیلہ ڈویژن نے خطے کی صنعتی و معاشی ترقی میں کمپنی کے کردار کو سراہا اور یقین دلایا کہ ضلعی انتظامیہ قانون کے دائرہ کار میں رہتے ہوئے ہر ممکن تعاون فراہم کرے گی۔ کمپنی انتظامیہ نے کمشنر اور اسسٹنٹ کمشنر حب کا شکریہ ادا کیا اور سکیورٹی، CSR اور دیگر امور میں مکمل تعاون جاری رکھنے کے عزم کا اظہار کیا۔

تصویر: بشکریہ ڈی جی پی آر بلوچستان