کسی بھی محاذ پر لڑائی کا مطلب جنگ جاری رہنا ہے، ایرانی نائب وزیر خارجہ سعید خطیب زادہ

تہران: ایران کے نائب وزیر خارجہ سعید خطیب زادہ نے کہا ہے کہ خطے میں امن کے لیے تمام محاذوں پر جنگ کا خاتمہ ضروری ہے۔ ان کے مطابق کسی بھی محاذ پر لڑائی جاری رہنے کا مطلب ہے کہ جنگ پورے خطے میں جاری ہے۔

ایرانی خبر رساں ادارے کے مطابق لبنان کے ٹی وی نیٹ ورک المیادین کو انٹرویو دیتے ہوئے انہوں نے کہا کہ ایران لبنان پر اسرائیلی حملے ختم کرانے کے لیے پرعزم ہے۔ اس مقصد کو ایران اور امریکہ کے درمیان جون میں طے پانے والی اسلام آباد مفاہمتی یادداشت میں شامل کیا گیا تھا۔

ان کے مطابق امریکہ اور اسرائیل نے ایران اور لبنان پر حملوں کے ذریعے اسلام آباد مفاہمت کی خلاف ورزی کی۔ انہوں نے کہا کہ اسرائیل پر اعتماد نہیں کیا جا سکتا کہ وہ اپنے وعدوں پر عمل کرے گا۔

سعید خطیب زادہ نے امریکہ کی ایران کے خلاف جنگ کو بین الاقوامی قانون کے تحت غیر قانونی قرار دیا۔ انہوں نے کہا کہ ایران اپنی خودمختاری اور علاقائی سالمیت کے دفاع کے لیے پرعزم ہے۔

انہوں نے مزید کہا کہ ایران نے آبنائے ہرمز کو سات روز کے اندر دوبارہ کھولنے کی تجویز بھی دی تھی۔