ڈیرہ مراد جمالی میں پانی کی قلت: ڈپٹی کمشنر نصیر آباد کے نوٹس پر لانگو محلہ اور کلرک کالونی میں فراہمی بحال

نصیر آباد: ڈپٹی کمشنر نصیر آباد وریندر لعل نے ڈیرہ مراد جمالی کے شہریوں کی جانب سے پانی کی قلت سے متعلق موصول ہونے والی شکایات کا فوری نوٹس لیتے ہوئے متعلقہ افسران کو ہنگامی بنیادوں پر اقدامات کی ہدایت جاری کر دی۔

عوامی شکایات کے پیشِ نظر ڈپٹی کمشنر نے لانگو محلہ، کلرک کالونی اور ملحقہ علاقوں میں پانی کی فراہمی کی بحالی کے لیے فوری احکامات جاری کیے۔ ان احکامات پر عملدرآمد کرتے ہوئے اسسٹنٹ کمشنر بہادر خان کھوسہ، تحصیلدار معظم خان جتوئی اور ریونیو عملے نے بروقت کارروائی کی اور جمالی واہ سے تالابوں تک پانی کی سپلائی شروع کر دی، جس سے متاثرہ علاقوں میں پانی کی فراہمی بحال ہو گئی۔

ضلعی انتظامیہ کے مطابق پانی کی فراہمی کا یہ سلسلہ بلا تعطل جاری رکھا جائے گا تاکہ شہریوں کو کسی قسم کی پریشانی نہ ہو۔ اسسٹنٹ کمشنر بہادر خان کھوسہ کی نگرانی میں پوری رات پانی کی فراہمی کا عمل جاری رہا، جبکہ ڈپٹی کمشنر وریندر لعل خود بھی صورتحال کی مسلسل نگرانی کرتے رہے اور لمحہ بہ لمحہ رپورٹ حاصل کرتے رہے۔

ڈپٹی کمشنر نصیر آباد نے کہا کہ عوامی مسائل کا فوری حل ضلعی انتظامیہ کی اولین ترجیح ہے۔ انہوں نے ہدایت کی کہ عوامی شکایات پر بروقت اور مؤثر کارروائی یقینی بنائی جائے اور بنیادی سہولیات کی فراہمی میں کسی قسم کی کوتاہی برداشت نہیں کی جائے گی۔ انہوں نے کہا کہ عوامی مسائل کے حل کے لیے تمام دستیاب وسائل بروئے کار لائے جائیں گے اور شہریوں کو ہر ممکن ریلیف فراہم کیا جائے گا۔

تصویر: بشکریہ ڈی جی پی آر بلوچستان