ڈپٹی کمشنر نصیرآباد وریندر لعل کی زیرِ صدارت ڈسٹرکٹ ریکروٹمنٹ کمیٹی کا اجلاس، میرٹ پر بھرتیوں کی ہدایت

نصیرآباد: ڈپٹی کمشنر نصیرآباد وریندر لعل کی زیرِ صدارت ڈسٹرکٹ ریکروٹمنٹ کمیٹی (ڈی آر سی) کا اہم اجلاس منعقد ہوا، جس میں ڈسٹرکٹ ایجوکیشن آفیسرز میل و فیمیل نصیرآباد، خزانہ آفیسر نصیرآباد، منظور شیرازی اور دیگر متعلقہ افسران نے شرکت کی۔

اجلاس سی آر سی کے اجلاس میں جاری کردہ ہدایات کی روشنی میں منعقد کیا گیا، جس کا بنیادی مقصد بھرتیوں کے عمل کو مکمل شفاف، منصفانہ اور خالصتاً میرٹ کی بنیاد پر یقینی بنانا تھا۔ اس موقع پر منٹس آف میٹنگ میں درج تمام نکات کا تفصیلی جائزہ لے کر ان پر مؤثر اور بروقت عملدرآمد کا لائحہ عمل طے کیا گیا۔

ڈپٹی کمشنر وریندر لعل نے ہدایت کی کہ اشتہار، درخواستوں کی وصولی، اسکروٹنی، شارٹ لسٹنگ، انٹرویوز اور فائنل سلیکشن سمیت بھرتی کے ہر مرحلے میں مکمل شفافیت، غیر جانبداری اور قواعد و ضوابط کی سختی سے پابندی یقینی بنائی جائے۔ انہوں نے کہا کہ کسی بھی امیدوار کے ساتھ ناانصافی یا امتیازی سلوک کی قطعاً گنجائش نہیں ہونی چاہیے۔

انہوں نے مزید ہدایت کی کہ ریکارڈ، اسکروٹنی یا دیگر مراحل میں جہاں کہیں بھی کمی بیشی، ابہام یا تکنیکی خامی سامنے آئے اسے فوری طور پر متعلقہ ہدایات اور قواعد کے مطابق درست کیا جائے تاکہ بعد میں کسی اعتراض یا شکایت کا امکان ختم ہو سکے۔

ڈپٹی کمشنر نے افسران کو تاکید کی کہ وہ اپنی ذمہ داریاں نہایت دیانتداری، پیشہ ورانہ مہارت اور شفاف انداز میں انجام دیں اور میرٹ کی بالادستی ہر صورت برقرار رکھیں، کیونکہ شفاف اور منصفانہ بھرتی کا عمل ہی عوام کے اعتماد کی بنیاد ہے۔

تصویر: بشکریہ ڈی جی پی آر بلوچستان