ڈپٹی کمشنر موسیٰ خیل عبدالرزاق خجک کا پی پی ایچ آئی میڈیسن اسٹور اور ٹیلی ہیلتھ سینٹر کا معائنہ

موسیٰ خیل: ڈپٹی کمشنر موسیٰ خیل عبدالرزاق خان خجک نے پی پی ایچ آئی کے مین میڈیسن اسٹور کا تفصیلی دورہ اور معائنہ کیا۔ اس موقع پر ڈسٹرکٹ منیجر پی پی ایچ آئی امان شاہ اور ایم اینڈ ای آفیسر عمران بزدار نے ڈپٹی کمشنر کو اسٹور کے امور اور کارکردگی کے حوالے سے تفصیلی بریفنگ دی۔

دورے کے دوران ڈپٹی کمشنر نے اسٹور میں موجود ادویات کے اسٹاک، ان کی معیاد (ایکسپائری ڈیٹس) اور دیگر ترسیلی ریکارڈ کا باریک بینی سے معائنہ کیا۔ انہوں نے پی پی ایچ آئی کی مجموعی کارکردگی کو سراہتے ہوئے اس عزم کا اظہار کیا کہ عوام کو صحت کی بہتر سہولیات کی فراہمی کے لیے تمام ممکنہ اقدامات جاری رکھے جائیں گے۔

علاوہ ازیں ڈپٹی کمشنر نے پی پی ایچ آئی کے زیرِ انتظام ٹیلی ہیلتھ سینٹر کا بھی معائنہ کیا اور سینٹر میں روزانہ آنے والے مریضوں (ڈیلی او پی ڈی)، صفائی ستھرائی کے انتظامات اور مریضوں کو دی جانے والی طبی سہولیات کا تفصیلی جائزہ لیا۔ انہوں نے فراہم کردہ سہولیات اور انتظامات پر اطمینان کا اظہار کیا۔

ڈپٹی کمشنر کا کہنا تھا کہ ضلعی انتظامیہ اور محکمہ صحت عوام کو بنیادی صحت کی معیاری سہولیات دہلیز تک فراہم کرنے کے لیے پرعزم ہیں۔ انہوں نے اس عزم کا اعادہ کیا کہ صحت کے مراکز میں ادویات کی دستیابی اور عملے کی حاضری کو ہر صورت یقینی بنایا جائے گا تاکہ دورافتادہ علاقوں کے مکینوں کو علاج معالجے کے بہترین مواقع میسر آسکیں۔

تصویر: بشکریہ ڈی جی پی آر بلوچستان