چمن: ڈسٹرکٹ کوآرڈینیشن کمیٹی کا اجلاس، صفائی و شجرکاری مہم اور امن و امان کا جائزہ

چمن: ڈپٹی کمشنر چمن حبیب احمد بنگلزئی کی زیرِ صدارت ڈپٹی کمشنر آفس میں ڈسٹرکٹ کوآرڈینیشن کمیٹی (DCC) کا اجلاس منعقد ہوا، جس میں ضلعی انتظامیہ، سکیورٹی اداروں اور مختلف محکموں کے افسران نے شرکت کی۔

اجلاس میں ضلع کی مجموعی انتظامی صورتحال، امن و امان، سکیورٹی انتظامات، بین المحکمہ رابطہ کاری اور عوامی مفاد کے امور کا جائزہ لیا گیا۔ وزیر اعلیٰ بلوچستان میر سرفراز بگٹی اور اسپیکر بلوچستان اسمبلی کیپٹن (ر) عبدالخالق اچکزئی کی ہدایات کی روشنی میں جاری صفائی اور شجرکاری مہم پر خصوصی توجہ دی گئی، اور میونسپل کارپوریشن، لوکل گورنمنٹ اور محکمہ جنگلات کے افسران نے بریفنگ دی۔

ڈپٹی کمشنر نے ہدایت کی کہ شہر کے اہم مقامات، شاہراہوں، بازاروں اور داخلی و خارجی راستوں پر صفائی کے انتظامات یقینی بنائے جائیں اور شجرکاری مہم کے ساتھ لگائے گئے پودوں کی حفاظت پر خصوصی توجہ دی جائے۔ انہوں نے عوام کے جان و مال کے تحفظ کے لیے اداروں میں رابطہ کاری مزید مضبوط بنانے کی ہدایت بھی کی۔

حبیب احمد بنگلزئی نے کہا کہ صاف ستھرا، سرسبز اور پُرامن چمن ضلعی انتظامیہ کی اولین ترجیح ہے، اور تمام اداروں کو اپنی ذمہ داریاں مؤثر انداز میں ادا کرنا ہوں گی۔

تصویر: بشکریہ ڈی جی پی آر بلوچستان