پی ڈی ایم اے بلوچستان: ہنگامی حالات میں صنفی بنیاد پر تشدد سے تحفظ کے بلوچستان فریم ورک کا اجراء

کوئٹہ: صوبائی ڈیزاسٹر مینجمنٹ اتھارٹی (PDMA) بلوچستان کے زیرِ اہتمام ہنگامی حالات میں صنفی بنیاد پر تشدد (Gender-Based Violence in Emergencies) کے حوالے سے بلوچستان فریم ورک کے اجراء کی تقریب کانفرنس ہال پی ڈی ایم اے بلوچستان کوئٹہ میں منعقد ہوئی۔

تقریب کی صدارت ڈائریکٹر پی ڈی ایم اے بلوچستان نوید احمد شیخ نے کی، جبکہ متعلقہ سرکاری اداروں، اقوامِ متحدہ کے ادارے UNFPA، آسٹریلین ایڈ اور دیگر شراکت دار اداروں کے نمائندگان اور ماہرین نے شرکت کی۔

تقریب کا بنیادی مقصد قدرتی آفات، ہنگامی صورتحال اور دیگر بحرانی حالات کے دوران خواتین اور لڑکیوں سمیت متاثرہ افراد کو صنفی بنیاد پر تشدد سے تحفظ فراہم کرنے کے لیے مؤثر نظام اور مربوط حکمتِ عملی وضع کرنا ہے۔

«From Preparedness to Protection — Together for a Safer, More Resilient Balochistan» کے عنوان سے تقریب میں اس عزم کا اظہار کیا گیا کہ بلوچستان میں ہنگامی حالات سے نمٹنے کے ساتھ ساتھ متاثرہ آبادی کے تحفظ، بالخصوص خواتین اور کمزور طبقات کے حقوق اور سلامتی کو بھی یقینی بنایا جائے گا۔

مقررین نے کہا کہ آفات اور ہنگامی حالات میں خواتین اور دیگر کمزور طبقات کو درپیش خطرات میں اضافہ ہو جاتا ہے، اس لیے پیشگی تیاری، بروقت تحفظ، اداروں کے درمیان رابطے اور مؤثر امدادی نظام ناگزیر ہیں۔ تقریب میں بلوچستان کے لیے GBViE فریم ورک کو ایک اہم قدم قرار دیتے ہوئے اس کے مؤثر نفاذ پر زور دیا گیا۔

تصویر: بشکریہ ڈی جی پی آر بلوچستان