پھلین بلوچ کا تربت پریس کلب کا دورہ، ڈیجیٹل اسٹوڈیو کے لیے 40 لاکھ روپے کے فنڈز پر شکریہ

تربت: پنجگور/کیچ سے رکن قومی اسمبلی اور قائمہ کمیٹی برائے اطلاعات و نشریات کے چیئرمین پھلین بلوچ نے تربت پریس کلب کا دورہ کیا، جہاں انہوں نے پی ایس ڈی پی فنڈز سے زیرِ تعمیر پریس کلب کی نئی عمارت اور بی ایس ڈی آئی فنڈز سے تزئین و آرائش کیے گئے آڈیٹوریم کا معائنہ کیا۔ اس موقع پر مشکور انور بلوچ سمیت دیگر اہلکار بھی ان کے ہمراہ تھے۔

تربت پریس کلب کے صدر حافظ صلاح الدین سلفی اور فنانس سیکرٹری مقبول ناصر نے انہیں جاری تعمیراتی کاموں اور صحافیوں کو دی جانے والی سہولیات پر بریفنگ دی، اور ایم این اے فنڈز سے پریس کلب کے ڈیجیٹل اسٹوڈیو کی تعمیر کے لیے 40 لاکھ روپے جاری کرنے پر پھلین بلوچ کا شکریہ ادا کیا۔

انہوں نے بتایا کہ نئی عمارت مکمل ہونے کے بعد ڈیجیٹل اسٹوڈیو کا کام شروع کیا جائے گا، جس سے پریس کلب کے ممبران کو اپنے میڈیا چینلز کے لیے ویڈیو ریکارڈنگ اور دیگر ڈیجیٹل میڈیا سہولیات میسر ہوں گی۔

پھلین بلوچ نے کہا کہ ہماری ہمیشہ کوشش رہی ہے کہ ادارے مضبوط اور مستحکم ہوں، اور ہم نے ہمیشہ ادبی، ثقافتی اور دیگر اداروں کی ترقی و استحکام پر خصوصی توجہ دی ہے۔ تقریب کے اختتام پر پریس کلب کے عہدیداران نے مہمانوں کا شکریہ ادا کیا۔

تصویر: بشکریہ ڈی جی پی آر بلوچستان