پسنی: PITE بلوچستان کا 16 روزہ اساتذہ تربیتی پروگرام اختتام پذیر، 31 اساتذہ میں سرٹیفکیٹ تقسیم

پسنی: گلوبل پارٹنرشپ فار ایجوکیشن (GPE) اور یونیسیف (UNICEF) کے تعاون سے پروونشل انسٹیٹیوٹ فار ٹیچر ایجوکیشن (PITE) بلوچستان کے زیرِ اہتمام خواندگی اور عددی مہارتوں کے فروغ کے لیے 16 روزہ اساتذہ تربیتی پروگرام پسنی میں کامیابی سے اختتام پذیر ہو گیا۔

تربیتی ورکشاپ میں پسنی سے 31 اساتذہ نے شرکت کی، جہاں ماسٹر ٹرینرز نذیر باہوٹ اور حاکم حکیم نے شرکاء کو جدید تدریسی طریقہ کار، خواندگی، عددی مہارتوں اور مؤثر تعلیمی حکمتِ عملیوں کے حوالے سے عملی تربیت فراہم کی۔

ورکشاپ کے اختتام پر شرکاء میں سرٹیفکیٹ تقسیم کیے گئے۔ تقریب میں گورنمنٹ بوائز مڈل اسکول اورماڑی محلہ پسنی کے ہیڈ ماسٹر سخیداد، لرننگ کوآرڈینیٹر موسیٰ امیت، مرکزی چیئرمین PWOD پرویز سفر اور سماجی کارکن میر سلمان کلمتی نے شرکت کی۔

مقررین نے اساتذہ کی پیشہ ورانہ استعداد بڑھانے اور طلبہ میں بنیادی تعلیمی مہارتوں کے فروغ کے لیے اس نوعیت کے تربیتی پروگراموں کی اہمیت پر زور دیا اور منتظمین، ماسٹر ٹرینرز اور اساتذہ کی کاوشوں کو سراہا۔ پروگرام کا مقصد اساتذہ کی پیشہ ورانہ صلاحیتوں میں اضافہ، جدید تدریسی طریقہ کار سے آگاہی اور طلبہ میں پڑھنے، لکھنے اور بنیادی حساب کتاب کی مہارتوں کو بہتر بنانا تھا۔

تصویر: بشکریہ ڈی جی پی آر بلوچستان