پسنی کے گورنمنٹ بوائز ہائیر سیکنڈری اسکول میں تعلیمی گیمز کے ذریعے تدریس: فلیش کارڈز، پزلز اور کوئز

پسنی: صوبائی حکومت کی تعلیم دوست پالیسی اور ضلعی ایجوکیشن آفیسر گوادر زاہد حسین کی ہدایات کی روشنی میں گورنمنٹ بوائز ہائیر سیکنڈری اسکول پسنی میں طلباء کی تعلیمی استعداد، ذہنی نشوونما اور سیکھنے کے عمل کو مزید مؤثر بنانے کے لیے دلچسپ اور معلوماتی تعلیمی گیمز کے ذریعے تدریسی سرگرمیاں جاری ہیں۔

اسکول میں فلیش کارڈز، ٹو اِن ون، پزلز، کوئز اور دیگر تعلیمی گیمز کو تدریسی عمل کا حصہ بنایا گیا ہے، جن کے ذریعے طلباء کو مختلف مضامین اور موضوعات آسان، دلچسپ اور عملی انداز میں سیکھنے کے مواقع مل رہے ہیں۔

ان سرگرمیوں کا بنیادی مقصد روایتی تدریسی طریقوں کے ساتھ جدید اور طلباء مرکز تعلیمی حکمتِ عملیوں کو فروغ دینا ہے، تاکہ طلباء میں تنقیدی سوچ، مشاہدے، مسئلہ حل کرنے، باہمی تعاون، گروپ ورک اور مقابلے کا مثبت جذبہ پیدا ہو اور ان کے ذخیرۂ الفاظ اور معلومات میں بھی اضافہ ہو۔

تعلیمی گیمز کے ذریعے طلباء نہ صرف تدریسی سرگرمیوں میں بھرپور دلچسپی لیتے ہیں بلکہ عملی شرکت سے تصورات کو بہتر طور پر سمجھنے اور اپنی صلاحیتیں بروئے کار لانے کے قابل بھی ہوتے ہیں۔ اس طریقۂ تدریس سے کلاس روم میں خوشگوار، دوستانہ اور فعال تعلیمی ماحول کو فروغ مل رہا ہے۔

صوبائی حکومت کی تعلیم دوست پالیسی کے تحت ایسی سرگرمیاں معیاری تعلیم کے فروغ، طلباء کی تخلیقی صلاحیتوں کی نشوونما اور تدریسی عمل کو زیادہ مؤثر بنانے کی جانب مثبت قدم ہیں۔ ضلعی محکمہ اسکول ایجوکیشن گوادر کی جانب سے تعلیمی بہتری، جدید تدریسی طریقوں کے فروغ اور طلباء کی ہمہ جہت نشوونما کے لیے اقدامات کی حوصلہ افزائی کی جا رہی ہے۔

تصویر: بشکریہ ڈی جی پی آر بلوچستان