پسنی: اسسٹنٹ کمشنر خسرو دلاوری کا پٹرول پمپس پر اچانک چھاپہ، کم ایندھن دینے پر ایک پمپ سیل

گوادر/پسنی: ڈپٹی کمشنر گوادر نقیب اللہ کاکڑ کی خصوصی ہدایت پر اسسٹنٹ کمشنر پسنی خسرو دلاوری نے عوامی شکایات کا فوری نوٹس لیتے ہوئے شہر کے مختلف پٹرول پمپس کا اچانک معائنہ کیا، جس کے دوران پٹرولیم مصنوعات کی مقررہ سرکاری نرخوں کے مطابق فروخت، پیمانے اور فی لیٹر ایندھن کی مقدار کا تفصیلی جائزہ لیا گیا۔

معائنے کے دوران ایک پٹرول پمپ پر مقررہ مقدار سے کم ایندھن فراہم کرنے کی شکایت درست ثابت ہونے پر اسے موقع پر سیل کر دیا گیا۔ اسسٹنٹ کمشنر نے پمپ انتظامیہ کو ہدایت کی کہ عوام کو مقررہ نرخوں پر درست مقدار میں ایندھن کی فراہمی یقینی بنائی جائے، اور پیمانے میں کمی، زائد نرخ وصول کرنے یا صارفین کو کسی بھی صورت نقصان پہنچانے کی اجازت نہیں دی جائے گی۔

خسرو دلاوری نے پٹرول پمپ مالکان کو خبردار کیا کہ مقررہ نرخوں اور پیمانے کی خلاف ورزی پر بلاامتیاز قانونی کارروائی ہوگی اور صارفین کے حقوق کا ہر صورت تحفظ کیا جائے گا۔

بعد ازاں انہوں نے مین بازار پسنی میں مختلف جنرل اسٹورز کا معائنہ کرکے اشیائے خوردونوش کی قیمتوں، معیار اور زائد المیعاد مصنوعات کی موجودگی کا جائزہ لیا اور دکانداروں کو معیاری اشیاء مقررہ نرخوں پر فراہم کرنے اور زائد المیعاد اشیاء کی فروخت سے مکمل اجتناب کی ہدایت کی۔ انہوں نے کہا کہ ناجائز منافع خوری اور غیر معیاری اشیاء کی فروخت کی روک تھام ضلعی انتظامیہ کی اولین ترجیحات میں شامل ہے اور بازاروں کی نگرانی مزید مؤثر بنائی جائے گی۔

تصویر: بشکریہ ڈی جی پی آر بلوچستان