ورلڈ پاپولیشن ڈے: لورالائی میں محکمہ بہبودِ آبادی کا میگا سیمینار، خاندانی منصوبہ بندی پر آگاہی

لورالائی: ورلڈ پاپولیشن ڈے کے موقع پر سیکرٹری محکمہ بہبودِ آبادی بلوچستان اور ڈائریکٹر جنرل کی ہدایات پر، روز کنسلٹنگ (Riz Consulting) اور پی ایس آئی (PSI) کے تعاون سے ضلعی محکمہ بہبودِ آبادی لورالائی نے ضلعی پاپولیشن ویلفیئر آفیسر ڈاکٹر نسرین گل کی سربراہی میں انسٹیٹیوٹ آف نرسنگ، ٹیچنگ ہسپتال لورالائی میں میگا آگاہی سیمینار منعقد کیا۔

سیمینار کا مقصد عوام میں آبادی سے متعلق مسائل، خاندانی منصوبہ بندی، تولیدی صحت، ماں اور بچے کی بہتر صحت، پیدائش میں مناسب وقفے، ذمہ دار والدین اور پائیدار ترقی کی اہمیت کے بارے میں آگاہی پیدا کرنا تھا۔ تقریب میں ڈاکٹرز، نرسنگ طلبہ، اساتذہ، طبی عملے، محکمہ بہبودِ آبادی کے افسران و اہلکاروں اور دیگر متعلقہ افراد نے بڑی تعداد میں شرکت کی۔

مقررین: خاندانی منصوبہ بندی صحت مند معاشرے کی بنیاد

تقریب کی مہمانِ خصوصی ڈاکٹر زرینہ خان تھیں، جبکہ ڈاکٹر نگہت، ڈاکٹر صادقہ خان، ڈاکٹر فضیلہ، ڈاکٹر زرمینہ خان، مسز ڈاکٹر نجم اور ڈاکٹر سکینہ نے مختلف موضوعات پر خطاب کیا۔ مقررین نے کہا کہ خاندانی منصوبہ بندی، تولیدی صحت اور زچہ و بچہ کی بہتر نگہداشت صحت مند اور خوشحال معاشرے کی بنیاد ہے، اور عوام تک درست معلومات پہنچانے اور بہتر رہنمائی فراہم کرنے میں طبی ماہرین کا کردار انتہائی اہم ہے۔

ضلعی پاپولیشن ویلفیئر آفیسر ڈاکٹر نسرین گل نے کہا کہ آبادی سے متعلق آگاہی، ذمہ دار والدین اور صحت مند خاندانوں کا فروغ وقت کی اہم ضرورت ہے۔ عوام میں شعور اجاگر کرنے اور صحت مند معاشرے کے قیام کے لیے تمام متعلقہ اداروں کو باہمی تعاون سے اپنی ذمہ داریاں ادا کرنا ہوں گی۔

سیمینار میں سوال و جواب کی نشست بھی ہوئی، جس میں شرکاء نے بھرپور دلچسپی لی۔ اختتام پر نمایاں کارکردگی دکھانے والے شرکاء میں انعامات تقسیم کیے گئے، جبکہ منتظمین نے مہمانِ خصوصی، مقررین، اساتذہ، طلبہ اور تمام شرکاء کا کامیاب سیمینار پر شکریہ ادا کیا۔

تقریب کے اختتام پر محکمہ بہبودِ آبادی لورالائی، روز کنسلٹنگ (Riz Consulting) اور پی ایس آئی (PSI) کے باہمی تعاون کو سراہتے ہوئے عزم ظاہر کیا گیا کہ عوامی خدمت، بہبودِ آبادی، تولیدی صحت اور خاندانی منصوبہ بندی سے متعلق آگاہی مہم آئندہ بھی مؤثر انداز میں جاری رکھی جائے گی۔ شرکاء نے امید ظاہر کی کہ ایسے مشترکہ پروگرام عوام میں شعور بیدار کرنے، صحت مند خاندانوں کے فروغ اور ایک خوشحال، متوازن اور پائیدار معاشرے کے قیام میں اہم کردار ادا کریں گے۔

تصویر: بشکریہ ڈی جی پی آر بلوچستان