نصیرآباد ڈویژن: لیڈی میڈیکل آفیسرز اور اسٹاف نرسز کی 23 آسامیوں کے لیے انٹرویوز

نصیرآباد: نصیرآباد ڈویژن میں محکمہ صحت کی افرادی قوت کو مستحکم بنانے کے لیے وزیر اعلیٰ بلوچستان میر سرفراز بگٹی کے وژن اور چیف سیکرٹری شکیل قادر خان کے احکامات کی روشنی میں بھرتی کے دوسرے مرحلے میں لیڈی میڈیکل آفیسرز اور فی میل اسٹاف نرسز کی خالی آسامیوں پر امیدواروں کے انٹرویوز کیے گئے۔

ڈویژنل ہیلتھ کمیٹی کے چیئرمین و کمشنر نصیرآباد ڈویژن صلاح الدین نورزئی کی نگرانی میں لیڈی میڈیکل آفیسرز کی 19 اور فی میل اسٹاف نرسز کی 4 آسامیوں کے امیدواروں کی تعلیمی اسناد، تجربے اور دیگر دستاویزات کی جانچ پڑتال کی گئی، جبکہ کمیٹی اراکین نے امیدواروں سے سوالات کرکے ان کی پیشہ ورانہ صلاحیت اور اہلیت کا جائزہ لیا۔

اس موقع پر ڈپٹی کمشنر صحبت پور فریدہ ترین، ڈویژنل ڈائریکٹر ہیلتھ داؤد خان کانسی، ایم ایس ڈاکٹر حبیب پندرانی اور ڈویژنل ہیلتھ کمیٹی کے دیگر اراکین موجود تھے۔

کمشنر صلاح الدین نورزئی نے کہا کہ محکمہ صحت میں خالی آسامیوں پر میرٹ اور شفافیت کے ساتھ بھرتی کا عمل جاری ہے، جس کا مقصد طبی مراکز میں افرادی قوت بہتر بنانا اور عوام کو ان کی دہلیز پر معیاری طبی سہولیات فراہم کرنا ہے۔ انہوں نے کہا کہ خواتین کے لیے طبی خدمات میں لیڈی میڈیکل آفیسرز اور اسٹاف نرسز کا کردار انتہائی اہم ہے اور ان تقرریوں سے خصوصاً خواتین اور بچوں کو بہتر طبی سہولیات ملیں گی۔

تصویر: بشکریہ ڈی جی پی آر بلوچستان