نصیرآباد: ڈسٹرکٹ ایجوکیشن کمیٹی کا اجلاس، اساتذہ کی حاضری یقینی بنانے اور غیر حاضروں کے خلاف کارروائی کی ہدایت

نصیرآباد: ڈپٹی کمشنر نصیرآباد وریندر لعل کی زیرِ صدارت ڈسٹرکٹ ایجوکیشن کمیٹی کا اجلاس منعقد ہوا، جس میں اسسٹنٹ کمشنر ڈیرہ مراد جمالی بہادر خان کھوسہ، ڈسٹرکٹ ایجوکیشن آفیسر میل و فیمیل، منظور شیرازی سمیت محکمہ تعلیم کے دیگر افسران نے شرکت کی۔

اجلاس میں ضلع میں تعلیمی نظام کی مجموعی صورتحال، سرکاری اسکولوں میں اساتذہ کی حاضری، تدریسی سرگرمیوں، طلبہ کی تعداد، غیر حاضر ملازمین کے خلاف کارروائی، تنخواہوں میں کٹوتی اور محکمہ تعلیم کو درپیش دیگر مسائل کا تفصیلی جائزہ لیا گیا۔ افسران نے اساتذہ و طلبہ کی حاضری، تعلیمی سرگرمیوں کے تسلسل اور تدریسی سہولیات پر بریفنگ دی۔

ڈپٹی کمشنر نے ہدایت کی کہ تمام سرکاری تعلیمی اداروں میں اساتذہ کی بروقت حاضری یقینی بنائی جائے اور غیر حاضر ملازمین کے خلاف قواعد کے مطابق کارروائی کی جائے۔ انہوں نے کہا کہ جدید اور معیاری تعلیم کے فروغ کے بغیر کوئی قوم ترقی نہیں کر سکتی، اور اساتذہ اپنے فرائض کو قومی ذمہ داری سمجھتے ہوئے ایمانداری، لگن اور محنت سے انجام دیں۔

وریندر لعل نے افسران کو ہدایت کی کہ تعلیمی اداروں کے باقاعدگی سے دورے کریں، حاضری کی مؤثر نگرانی کریں اور کمی یا کوتاہی فوری دور کی جائے۔ انہوں نے کہا کہ طلبہ کی تعداد بڑھانے کے ساتھ تعلیم کا معیار بہتر بنانا بھی محکمہ تعلیم کی اولین ترجیح ہونی چاہیے، اور واضح کیا کہ تعلیم کے شعبے میں کسی غفلت یا لاپرواہی کو برداشت نہیں کیا جائے گا۔

تصویر: بشکریہ ڈی جی پی آر بلوچستان