نصیرآباد میں 77 سرکاری دکانوں کے کرایوں کا ازسرِنو تعین، ڈی سی وریندر لعل کی مارکیٹ ریٹ پر اسسمنٹ کی ہدایت

نصیرآباد: ڈپٹی کمشنر نصیرآباد وریندر لعل کی زیرِ صدارت رینٹ اسسمنٹ کمیٹی کا اہم اجلاس منعقد ہوا، جس میں سرکاری دکانوں کے کرایوں کے ازسرِنو تعین اور کرایے کی مد میں آمدن بڑھانے پر تفصیلی غور کیا گیا۔

اجلاس میں چیف آفیسر میونسپل کمیٹی ڈیرہ مراد جمالی، چیف آفیسر ڈسٹرکٹ کونسل نصیرآباد، ایکسین بلڈنگز اور ڈسٹرکٹ اکاؤنٹس آفیسر نصیرآباد سمیت دیگر افسران نے شرکت کی۔

بتایا گیا کہ میونسپل کمیٹی کے زیرِ انتظام 22 اور ڈسٹرکٹ کونسل کے زیرِ انتظام 55 سرکاری دکانیں ہیں، جن کے موجودہ کرایوں کا جائزہ لے کر نئے سرے سے کرایہ مقرر کیا جائے گا۔ ڈپٹی کمشنر نے اسسٹنٹ کمشنرز کو ہدایت کی کہ اپنے علاقوں میں ان دکانوں کی موجودہ مارکیٹ صورتحال، محلِ وقوع اور اردگرد کے کاروباری علاقوں کو مدِنظر رکھتے ہوئے کرایے کی باقاعدہ اسسمنٹ کرائی جائے۔

انہوں نے ہدایت کی کہ اسسمنٹ کا عمل شفاف اور زمینی حقائق کے مطابق مکمل کرکے رپورٹ آئندہ اجلاس میں پیش کی جائے تاکہ مارکیٹ ریٹ کے مطابق مناسب کرایوں کا تعین ہو سکے۔ ڈپٹی کمشنر نے کہا کہ سرکاری املاک سے آمدن بڑھانے کے لیے مؤثر اقدامات ناگزیر ہیں اور اضافی آمدن کو عوامی فلاح، بنیادی سہولیات کی بہتری اور دیگر ترقیاتی و فلاحی منصوبوں پر خرچ کیا جا سکتا ہے۔

اجلاس میں زور دیا گیا کہ سرکاری دکانوں کا ریکارڈ، کرایہ داری اور آمدن کے معاملات منظم رکھے جائیں اور تمام ادارے باہمی رابطے سے کام کریں تاکہ سرکاری وسائل کا بہتر استعمال یقینی بنایا جا سکے۔

تصویر: بشکریہ ڈی جی پی آر بلوچستان