نصیرآباد میں جشنِ آزادی پر مون سون شجرکاری مہم کا افتتاح، صادق عمرانی اور کمشنر نورزئی نے پودے لگائے

نصیرآباد: جشنِ آزادی کے موقع پر مون سون شجرکاری مہم کا باقاعدہ افتتاح کمشنر آفس نصیرآباد کے احاطے میں کیا گیا، جس کے انتظامات ڈپٹی کنزرویٹر فارسٹ نصیرآباد نعیم لہڑی کی سربراہی میں مکمل کیے گئے تھے۔

صوبائی وزیر ایریگیشن میر محمد صادق عمرانی، صوبائی پارلیمانی سیکرٹری برائے ایکسائز اینڈ ٹیکسیشن و رکن صوبائی اسمبلی حاجی محمد خان لہڑی، کمشنر نصیرآباد ڈویژن صلاح الدین نورزئی، ڈی آئی جی نصیرآباد رینج کامران نواز، پیپلز پارٹی کے ڈویژنل صدر میر بلال صادق عمرانی اور سیاسی و قبائلی رہنما عبدالرؤف لہڑی نے پودے لگا کر مہم کا افتتاح کیا۔ ایس ایس پی اسد ناصر، ونگ کمانڈر کرنل رضوان طیب اور سپرنٹنڈنگ انجینئر ایریگیشن سرکل مدثر ظفر کھوسہ بھی موجود تھے۔ شجرکاری مہم کی کامیابی اور پاکستان کی سالمیت، خوشحالی، امن و استحکام کے لیے خصوصی دعا کی گئی۔

صوبائی وزیر میر محمد صادق عمرانی، پارلیمانی سیکرٹری حاجی محمد خان لہڑی اور کمشنر صلاح الدین نورزئی نے کہا کہ درخت قدرت کا قیمتی تحفہ اور ماحول کے تحفظ کی ضمانت ہیں۔ شجرکاری کو قومی فریضہ سمجھتے ہوئے زیادہ سے زیادہ پودے لگائے جائیں اور ان کی حفاظت و نگہداشت بھی یقینی بنائی جائے۔ سرسبز و شاداب پاکستان آنے والی نسلوں کے محفوظ اور روشن مستقبل کی ضمانت ہے، اور جشنِ آزادی پر شجرکاری مہم کا آغاز وطن کو سرسبز، صاف اور خوشحال بنانے کے عزم کا اظہار ہے۔

تصویر: بشکریہ ڈی جی پی آر بلوچستان