مولانا ہدایت الرحمن کا محکمہ زراعت توسیع گوادر کا اچانک دورہ، زمینداروں کے لیے ٹیکس ریلیف کی سفارش کی ہدایت

گوادر: رکن صوبائی اسمبلی مولانا ہدایت الرحمن نے محکمہ زراعت توسیع کے دفتر کا اچانک دورہ کیا، جہاں ڈپٹی ڈائریکٹر زراعت توسیع مقبول احمد بلوچ نے انہیں محکمانہ کارکردگی، عملے کی حاضری، جاری زرعی سرگرمیوں اور زمینداروں کو درپیش مسائل پر بریفنگ دی۔

مولانا ہدایت الرحمن نے زمینداروں کی پیمائش کا عمل جاری رکھنے، مکمل رجسٹریشن والے زمینداروں کو انکم ٹیکس سے متعلق رہنمائی دینے اور خشک سالی و پانی کی قلت کے پیش نظر مستحق زمینداروں کے لیے ٹیکس ریلیف کی سفارش متعلقہ حکام کو بھیجنے کی ہدایت کی۔

انہوں نے ملازمین کی باقاعدہ حاضری یقینی بنانے، غیر حاضر اہلکاروں کے خلاف بلاامتیاز کارروائی اور آبپاشی و پانی ذخیرہ کرنے سمیت قابلِ عمل ترقیاتی منصوبے PSDP میں شامل کرنے پر زور دیا۔ ڈپٹی ڈائریکٹر واٹر مینجمنٹ علاؤالدین بلوچ سے واٹر مینجمنٹ منصوبوں، تالابوں، واٹر پورٹنگ اور سولر سسٹمز کی تکمیل و فعالیت کی تفصیلی رپورٹ بھی طلب کی گئی۔

دورے کے موقع پر زراعت آفیسر بابو نواز احمد سمیت محکمہ زراعت توسیع و واٹر مینجمنٹ کے افسران و اہلکار موجود تھے۔

تصویر: بشکریہ ڈی جی پی آر بلوچستان