موسیٰ خیل: اسسٹنٹ کمشنر درگ اظہر الدین سے اہلیان درگ کے وفد کی ملاقات، زرعی پانی اور امن و امان پر گفتگو

موسیٰ خیل: اسسٹنٹ کمشنر درگ اظہر الدین سے اہلیانِ درگ کے ایک وفد نے سردار اقبال احمد خان جعفر اور ملک نصر من اللہ جعفر کی قیادت میں ملاقات کی اور انہیں درگ میں تعیناتی پر مبارکباد دیتے ہوئے خوش آمدید کہا۔

ملاقات میں علاقے کے عوامی و انتظامی مسائل پر تفصیلی گفتگو ہوئی اور اہم پیش رفت دیکھنے میں آئی۔ علاقے میں امن و امان کی صورتحال برقرار رکھنے اور عوام کے تحفظ کے عزم کا اعادہ کیا گیا، جبکہ زمینوں اور کھیتوں تک رسائی کے راستوں کی بحالی اور درپیش مشکلات کا جائزہ لیا گیا۔

مال مویشی چرانے کی وجہ سے زمینداروں اور کسانوں کی فصلوں کو پہنچنے والے نقصانات کی روک تھام کے اقدامات پر بھی تفصیلی گفتگو ہوئی، اور زرعی زمینوں کی سیرابی کے لیے ویالوں اور نالیوں کی بروقت صفائی کے نظام کی بہتری کے اقدامات زیرِ بحث آئے۔

زرعی زمینوں کے لیے پانی کی تقسیم کے دیرینہ مسائل کو باہمی رضامندی اور انصاف کے اصولوں پر حل کرنے کے لیے اہم فیصلے اور پیش رفت ہوئی۔ اسسٹنٹ کمشنر درگ نے وفد کی تجاویز کا خیر مقدم کرتے ہوئے تمام جائز مسائل کو ترجیحی بنیادوں پر حل کرنے اور عوام کو سہولیات کی فراہمی کا اعادہ کیا۔

تصویر: بشکریہ ڈی جی پی آر بلوچستان