محکمہ ماحولیات میں لواحقین کوٹہ پر 6 امیدواروں کو تقرری آرڈرز، مشیر نسیم الرحمان ملاخیل کا خطاب

کوئٹہ: وزیراعلیٰ بلوچستان کے مشیر برائے ماحولیات و موسمیاتی تبدیلی نسیم الرحمان خان ملاخیل نے 7 ستمبر کو محکمہ ماحولیات و موسمیاتی تبدیلی کے زیر اہتمام تقریب میں لواحقین کوٹہ کے تحت 6 امیدواروں کو تقرری نامے دیے، جن کا معاملہ کافی عرصے سے زیر التوا تھا۔

تقریب کی صدارت مشیر ماحولیات نے کی، جبکہ سیکرٹری ماحولیات نور محمد پرانی اور ڈی جی ماحولیات ظہور بلوچ سمیت محکمے کے دیگر اعلیٰ افسران بھی موجود تھے۔

نسیم الرحمان خان ملاخیل نے کہا کہ سرکاری ملازمین اپنے فرائض ایمانداری سے انجام دیں تو صوبے کے دور دراز علاقوں سے آنے والے سائلین کے مسائل جلد حل ہو سکتے ہیں۔ انہوں نے لواحقین کوٹہ کے تحت بھرتیوں کا مرحلہ احسن انداز میں مکمل کرنے پر سیکرٹری اور ڈی جی ماحولیات کو مبارکباد کا مستحق قرار دیا۔

انہوں نے کہا کہ متوفی سرکاری ملازمین کے لواحقین کو ان کا حق دینا محکمہ ماحولیات کی اولین ترجیح ہے اور حکومتی ہدایات کی روشنی میں باقی زیر التوا کیسز بھی جلد از جلد نمٹائے جائیں گے۔ محکمے میں شفافیت اور میرٹ یقینی بنانے کے لیے تمام بھرتیاں قواعد و ضوابط کے مطابق مکمل کی گئیں، اور اب ملازمت حاصل کرنے والوں کی ذمہ داری ہے کہ اپنی ڈیوٹیاں اخلاص اور ایمانداری سے انجام دیں۔

اس موقع پر نو تعینات ملازمین نے مشیر ماحولیات نسیم الرحمان ملاخیل اور محکمہ ماحولیات کا شکریہ ادا کیا۔

تصویر: بشکریہ ڈی جی پی آر بلوچستان