محکمہ جنگلات بلوچستان اور BRSP میں قدرتی وسائل کے تحفظ اور شجرکاری کے لیے مفاہمتی معاہدہ

کوئٹہ: محکمہ جنگلات و جنگلی حیات بلوچستان اور بلوچستان رورل سپورٹ پروگرام (BRSP) کے درمیان قدرتی وسائل کے تحفظ، ماحولیاتی آگاہی، جنگلات میں آتشزدگی کی روک تھام، شجرکاری اور موسمیاتی تبدیلی کے اثرات سے نمٹنے کے لیے باہمی تعاون کا مفاہمتی معاہدہ طے پا گیا۔

معاہدے پر سیکرٹری جنگلات و جنگلی حیات بلوچستان عمران گچکی اور BRSP کے چیف ایگزیکٹو آفیسر ڈاکٹر طاہر رشید نے دستخط کیے۔ معاہدے کے تحت دونوں ادارے جنگلات، چراگاہوں، آبی ذخائر، جنگلی حیات کے مسکن اور دیگر قدرتی وسائل کے تحفظ، بحالی اور پائیدار استعمال کے لیے مقامی کمیونٹیز کو شامل کر کے مشترکہ اقدامات کریں گے۔

آتشزدگی کی روک تھام اور شجرکاری

معاہدے کے اہم نکات میں جنگلات میں آتشزدگی کی روک تھام، بروقت اطلاع رسانی، کمیونٹی رضاکاروں کی تربیت، آگ پر قابو پانے کے اقدامات اور متاثرہ علاقوں کی بحالی شامل ہیں۔ غیر قانونی کٹائی، غیر قانونی شکار، جنگلی حیات کے غیر مجاز استعمال اور غیر قانونی چرائی کی روک تھام کے لیے کمیونٹی سطح پر نگرانی کا نظام بھی مضبوط کیا جائے گا۔

دونوں ادارے موسم بہار اور مون سون کی شجرکاری مہمات میں مشترکہ طور پر حصہ لیں گے؛ محکمہ جنگلات اپنی نرسریوں سے مقامی اور ماحول دوست پودے فراہم کرے گا جبکہ BRSP اپنے کمیونٹی نیٹ ورک اور فیلڈ اسٹاف کے ذریعے عوامی شمولیت یقینی بنائے گا۔ معاہدے میں زرعی جنگلات (Agroforestry)، مٹی اور پانی کے تحفظ، ایندھن کی بچت کرنے والی ٹیکنالوجیز اور قابل تجدید توانائی کے فروغ پر بھی تعاون شامل ہے تاکہ لکڑی بطور ایندھن پر انحصار اور جنگلات پر دباؤ کم ہو۔

دونوں ادارے موسمیاتی تبدیلی، حیاتیاتی تنوع، ماحولیاتی بحالی اور کاربن فنانس میں مشترکہ منصوبے تیار کریں گے اور قومی و بین الاقوامی مالیاتی اداروں سے تعاون کے لیے مشترکہ کوششیں کریں گے۔ نگرانی کے لیے Joint Coordination Committee (JCC) قائم کی جائے گی جو سہ ماہی اجلاس منعقد کرے گی۔ معاہدہ ابتدائی طور پر پانچ سال کے لیے مؤثر ہوگا جس میں باہمی رضامندی سے توسیع ہو سکے گی، جبکہ مخصوص منصوبوں کے مالی وسائل الگ منصوبہ جاتی معاہدوں سے طے ہوں گے۔

تصویر: بشکریہ ڈی جی پی آر بلوچستان