لورالائی ڈویژن میں میڈیکل آفیسرز اور ڈینٹل سرجنز کی خالی آسامیوں پر انٹرویوز، کمشنر ولی محمد بڑیچ کی نگرانی

لورالائی: کمشنر لورالائی ڈویژن ولی محمد بڑیچ کی نگرانی میں محکمہ صحت کے تحت کنٹریکٹ کی بنیاد پر خالی آسامیوں پر ڈاکٹروں کے انٹرویوز دوسرے روز بھی جاری رہے، جن میں ڈویژن کے مختلف اضلاع سے سینکڑوں امیدواروں نے شرکت کی۔

ان آسامیوں میں میڈیکل آفیسرز اور ڈینٹل سرجنز کی خالی نشستیں شامل ہیں، جن کے لیے لورالائی، موسیٰ خیل، زیارت، دکی اور ہرنائی سمیت مختلف اضلاع سے بڑی تعداد میں امیدوار پہنچے۔ محکمہ صحت کے افسران اور ماہرین نے امیدواروں کے تعلیمی ریکارڈ، پیشہ ورانہ قابلیت اور مقررہ معیار کے مطابق انٹرویوز لیے اور دستاویزات کا جائزہ بھی لیا۔

کمشنر ولی محمد بڑیچ نے خود بھی انٹرویو کے عمل کا جائزہ لیا اور بھرتی کے طریقہ کار، امیدواروں کی شرکت اور انتظامات پر بریفنگ حاصل کی۔ اس موقع پر ڈویژنل ڈائریکٹر ہیلتھ ڈاکٹر مقبول احمد، ایم ایس دکی ڈاکٹر جوہر خان اور ایم ایس لورالائی ڈاکٹر نقیب اللہ نیازی سمیت محکمہ صحت کے دیگر افسران بھی موجود تھے۔

کمشنر نے ہدایت کی کہ تمام امیدواروں کو میرٹ اور قواعد و ضوابط کے مطابق یکساں مواقع دیے جائیں اور بھرتی کے تمام مراحل شفاف انداز میں مکمل کیے جائیں۔ انہوں نے کہا کہ خالی آسامیوں پر اہل ڈاکٹروں کی تعیناتی سے ڈویژن کے اضلاع میں عوام کو بہتر طبی سہولیات ملیں گی اور صحت کے شعبے میں افرادی قوت کی کمی دور ہوگی۔

تصویر: بشکریہ ڈی جی پی آر بلوچستان