لورالائی: ایم ایس ٹیچنگ ہسپتال ڈاکٹر نقیب اللہ نیازی کا رات گئے اچانک دورہ، غیر حاضری ناقابلِ قبول قرار

لورالائی: ایم ایس ٹیچنگ ہسپتال لورالائی ڈاکٹر نقیب اللہ نیازی نے رات گئے ہسپتال کے مختلف شعبہ جات کا اچانک دورہ کیا اور طبی سہولیات، صفائی ستھرائی، عملے کی حاضری اور مریضوں کی دیکھ بھال کے انتظامات کا تفصیلی جائزہ لیا۔

دورے کے دوران انہوں نے وارڈز کا معائنہ کیا، زیرِ علاج مریضوں اور ان کے لواحقین سے ملاقات کر کے ادویات، علاج معالجے اور دیگر سہولیات کے بارے میں معلومات حاصل کیں، اور طبی عملے کو مریضوں کی بہتر دیکھ بھال اور بروقت علاج کی ہدایات جاری کیں۔ انہوں نے ایمرجنسی شعبے کا بھی تفصیلی معائنہ کیا اور ڈیوٹی پر موجود ڈاکٹرز، پیرامیڈیکس اور دیگر عملے سے امور کے بارے میں معلومات لیں۔

ایم ایس نے ہدایت کی کہ مریضوں کو بروقت، معیاری اور بہترین طبی سہولیات ہر صورت فراہم کی جائیں اور علاج میں کسی غفلت یا کوتاہی کو برداشت نہیں کیا جائے گا۔ انہوں نے کہا کہ ہسپتال آنے والا ہر مریض ہماری اولین ترجیح ہے، تمام ملازمین ڈیوٹی پر بروقت حاضر ہوں، اور ڈیوٹی سے غیر حاضری یا علاج میں لاپرواہی کسی صورت قابلِ قبول نہیں ہوگی۔

صفائی کے عملے کو ہدایت کی گئی کہ وارڈز، ایمرجنسی، راہداریوں اور دیگر شعبوں میں صفائی کا معیار مزید بہتر بنایا جائے۔ ڈاکٹر نقیب اللہ نیازی نے کہا کہ ہسپتال میں طبی سہولیات، عملے کی حاضری، صفائی اور نظم و ضبط کو خصوصی ترجیح دی جا رہی ہے، مختلف شعبوں کی باقاعدگی سے نگرانی کی جائے گی، اور ہسپتال انتظامیہ مریضوں کی مشکلات کے فوری ازالے کے لیے تمام ممکنہ اقدامات کر رہی ہے۔

تصویر: بشکریہ ڈی جی پی آر بلوچستان