قلعہ عبداللہ: گلستان اور دوبندی میں 331 ایکڑ پر بھنگ کی کاشت ختم

قلعہ عبداللہ: محکمہ ایکسائز اینڈ ٹیکسیشن نے بلوچستان میں منشیات کے خاتمے اور بھنگ و چرس کی غیر قانونی کاشت کے خلاف جاری انسدادِ بھنگ مہم 2026 کے تحت ضلع قلعہ عبداللہ کی تحصیل گلستان اور دوبندی میں مشترکہ کارروائیاں جاری رکھی ہوئی ہیں۔ 23 اکتوبر کو مختلف مشترکہ ٹیموں نے مجموعی طور پر 331 ایکڑ اراضی سے بھنگ کی کاشت ختم کی، جس کے بعد مہم کے آغاز سے اب تک ختم کی گئی بھنگ کی کاشت کا مجموعی رقبہ 992 ایکڑ ہو گیا ہے۔

کارروائی کی تفصیل

کارروائیاں ضلعی انتظامیہ قلعہ عبداللہ کی قیادت میں اسسٹنٹ کمشنر گلستان، اینٹی نارکوٹکس فورس (اے این ایف) بلوچستان، ایکسائز اینڈ ٹیکسیشن، فرنٹیئر کور، پولیس اور دیگر متعلقہ قانون نافذ کرنے والے اداروں کی مشترکہ معاونت سے انجام دی گئیں۔ اس موقع پر انٹیلی جنس بیورو، ملٹری انٹیلی جنس اور ایف سی آئی یو کے نمائندے بھی شریک تھے۔

محکمہ ایکسائز کے اہلکاروں کے مطابق گلستان کے علاقے عبدالرحمٰن زئی اور قندیل سئیگئی میں مشترکہ ٹیموں نے 285 ایکڑ اراضی سے بھنگ کی کاشت ختم کی، جبکہ دوبندی سب ڈویژن میں مزید 46 ایکڑ اراضی کو بھنگ کی کاشت سے پاک کیا گیا۔ اس طرح ایک روز میں مجموعی طور پر 331 ایکڑ اراضی پر کارروائی مکمل کی گئی۔

مہم جاری رہے گی

بھنگ کی کاشت ختم کرنے کے لیے مختلف طریقے استعمال کیے گئے۔ انسدادِ منشیات مہم میں ضلعی انتظامیہ، ایف سی، پولیس، اے این ایف اور محکمہ ایکسائز کے اہلکاروں نے حصہ لیا۔ متعلقہ اداروں کی مشترکہ ٹیمیں مربوط انداز میں کارروائیاں انجام دے رہی ہیں۔

حکام کے مطابق انسدادِ بھنگ مہم 2026 بھنگ کی کاشت کے مکمل خاتمے تک جاری رہے گی، جس کا مقصد منشیات کی پیداوار کی روک تھام اور علاقے کو منشیات سے پاک بنانے کی کوششوں کو مؤثر بنانا ہے۔