قلعہ عبداللہ میں کھلی کچہری: ڈی سی منور حسین مگسی اور ایم پی اے انجینئر زمرک خان اچکزئی نے عوامی مسائل سنے

قلعہ عبداللہ: ڈپٹی کمشنر قلعہ عبداللہ منور حسین مگسی کی زیرِ نگرانی ڈی سی کمپلیکس جنگل پیر علیزئی میں کھلی کچہری منعقد ہوئی، جس میں عوامی نیشنل پارٹی کے مرکزی رہنما اور رکن صوبائی اسمبلی انجینئر زمرک خان اچکزئی نے خصوصی شرکت کی۔ کھلی کچہری میں قبائلی عمائدین، شہریوں، عوامی نمائندوں اور مختلف سرکاری محکموں کے افسران شریک ہوئے۔

اس موقع پر ڈی پی او قلعہ عبداللہ خلیل احمد بگٹی، ایڈیشنل ڈپٹی کمشنر جنرل انجینئر نجم الدین کاکڑ، اسسٹنٹ کمشنر قلعہ عبداللہ سردار عبداللہ خان اچکزئی، ڈسٹرکٹ ہیلتھ آفیسر ڈاکٹر عبدالسلام کھوسو، ڈسٹرکٹ ایجوکیشن آفیسر احمد خان، ڈی ایم پی پی ایچ آئی ضیاء الرحمن، ڈسٹرکٹ سپرنٹنڈنٹس جعفر خان ترین اور محمد شفیق خان، ڈپٹی ایجوکیشن آفیسرز عبدالمنان اچکزئی اور گلستان حفیظ اللہ پیرعلیزئی، سوشل ویلفیئر آفیسر خلیل احمد، مسعود احمد اچکزئی، حبیب الرحمن، ڈپٹی فارسٹ آفیسر حکمت اللہ مجکوال، انجینئر منظور کاکڑ اور انجینئر خلیل احمد سمیت مختلف محکموں کے افسران موجود تھے۔

شہریوں اور قبائلی عمائدین نے سڑکوں، صحت، تعلیم، بجلی، امن و امان، ریونیو اور بنیادی سہولیات سے متعلق شکایات، تجاویز اور مطالبات پیش کیے۔ انجینئر زمرک خان اچکزئی نے عوامی مسائل توجہ سے سنے اور کہا کہ مسائل کی بروقت نشاندہی اور حل کے لیے عوام اور انتظامیہ کے درمیان براہِ راست رابطہ نہایت اہم ہے اور اداروں کو اپنی ذمہ داریاں مؤثر انداز میں ادا کرنی چاہئیں۔

ڈپٹی کمشنر منور حسین مگسی نے پیش کیے گئے مسائل کا جائزہ لیا، افسران سے بریفنگ حاصل کی اور ہدایت کی کہ عوامی مسائل کے حل کے لیے سنجیدہ اور عملی اقدامات کیے جائیں۔ انہوں نے کہا کہ ضلعی انتظامیہ عوام کو ریلیف، جائز شکایات کے ازالے اور بنیادی سہولیات کی بہتری کے لیے اپنی ذمہ داریاں پوری تندہی سے ادا کرے گی۔ شرکاء نے براہِ راست رابطے کا پلیٹ فارم فراہم کرنے پر ضلعی انتظامیہ کے اقدام کو سراہا۔

تصویر: بشکریہ ڈی جی پی آر بلوچستان