سپریم کورٹ کوئٹہ رجسٹری کے نئے ایڈمنسٹریشن بلاک کا سنگِ بنیاد، 226 ملین روپے کا منصوبہ ایک سال میں مکمل ہوگا

کوئٹہ: سپریم کورٹ آف پاکستان کوئٹہ برانچ رجسٹری کے نئے، جدید اور اسٹیٹ آف دی آرٹ ایڈمنسٹریشن بلاک کا سنگِ بنیاد رکھ دیا گیا۔

تقریب میں چیف جسٹس آف پاکستان جسٹس یحییٰ آفریدی، جسٹس جمال خان مندوخیل، جسٹس نعیم اختر افغان، جسٹس محمد ہاشم خان کاکڑ اور چیف جسٹس بلوچستان ہائیکورٹ جسٹس محمد کامران خان ملاخیل سمیت اعلیٰ عدالتی و انتظامی حکام نے شرکت کی۔ سپریم کورٹ آف پاکستان کے جسٹس جمال خان مندوخیل اور سپریم کورٹ کوئٹہ برانچ رجسٹری کے ڈپٹی رجسٹرار میر حسین نے نئے ایڈمنسٹریشن بلاک کا سنگِ بنیاد رکھا۔

اس موقع پر چیف جسٹس آف پاکستان جسٹس یحییٰ آفریدی اور چیف سیکرٹری بلوچستان شکیل قادر خان نے کوئٹہ پائن کا پودا لگا کر شجرکاری بھی کی۔ تقریب میں بلوچستان ہائیکورٹ کے معزز ججز، سینئر وکلا، عدالتی افسران اور دیگر متعلقہ حکام بھی موجود تھے۔

226 ملین روپے کا منصوبہ

نئے ایڈمنسٹریشن بلاک کی تعمیر پر تقریباً 226 ملین روپے لاگت آئے گی، جبکہ منصوبہ ایک سال کی مدت میں مکمل کیا جائے گا۔ منصوبے کی تعمیر محکمہ کمیونیکیشن اینڈ ورکس کی نگرانی میں عمل میں لائی جائے گی۔

نئے ایڈمنسٹریشن بلاک میں جدید تقاضوں کے مطابق انتظامی و دفتری سہولیات فراہم کی جائیں گی، جس سے سپریم کورٹ کوئٹہ برانچ رجسٹری کے انتظامی امور کو مزید مؤثر، منظم اور بہتر بنانے میں مدد ملے گی۔ جدید عمارت کی تکمیل سے عدالتی نظام سے وابستہ افسران، عملے اور دیگر متعلقہ افراد کو بھی بہتر سہولیات میسر آئیں گی۔

تقریب کے موقع پر عدالتی و انتظامی حکام نے اس امر پر زور دیا کہ عدالتی اداروں میں جدید انفراسٹرکچر اور سہولیات کی فراہمی سے نہ صرف انتظامی استعداد میں اضافہ ہوگا بلکہ انصاف کی فراہمی کے عمل کو بھی مزید مؤثر اور سہل بنانے میں مدد ملے گی۔

تصویر: بشکریہ ڈی جی پی آر بلوچستان