رائز بلوچستان پروگرام: گوادر میں 150 مستحق افراد میں ڈیڑھ ڈیڑھ لاکھ روپے کی گرانٹس، 40 بچیوں کو کٹس

گوادر: رائز بلوچستان پروگرام کے تحت گوادر میں 150 مستحق افراد میں ڈیڑھ، ڈیڑھ لاکھ روپے کی انکم جنریٹنگ گرانٹس، جبکہ بیوٹیشن اور بیکنگ کے کورسز مکمل کرنے والی 40 بچیوں میں سرٹیفکیٹس اور پیشہ ورانہ کٹس تقسیم کی گئیں۔

ڈپٹی کمشنر گوادر نقیب اللہ کاکڑ نے تقسیمِ اثاثہ جات کی تقریب سے خطاب کرتے ہوئے کہا کہ وزیر اعلیٰ بلوچستان میر سرفراز بگٹی کے وژن اور چیف سیکرٹری بلوچستان کی ہدایات کے تحت رائز بلوچستان پروگرام نوجوانوں اور خواتین کو معاشی طور پر خودمختار بنانے، غربت میں کمی اور خود روزگار کے مواقع پیدا کرنے میں اہم کردار ادا کر رہا ہے۔

تقریب میں اسلام آباد کے آئی آر ایم انسٹی ٹیوٹ سے بیوٹیشن کورس مکمل کرنے والی 27 بچیوں اور کراچی کے گوتم انسٹی ٹیوٹ سے بیکنگ کورس مکمل کرنے والی 13 بچیوں کو سرٹیفکیٹس اور پیشہ ورانہ کٹس فراہم کی گئیں، تاکہ وہ اپنے ہنر کو بروئے کار لاتے ہوئے روزگار حاصل کرنے اور ذاتی کاروبار شروع کرنے کے قابل ہو سکیں۔

چھ اضلاع کے لیے 16.79 ارب روپے

ڈپٹی کمشنر نے بتایا کہ رائز بلوچستان پروگرام کے تحت صوبے کے چھ منتخب اضلاع میں تین سال کے دوران 16.79 ارب روپے مختص کیے گئے ہیں۔ پروگرام کا مقصد مستحق خاندانوں کو معاشی طور پر مستحکم کرنا، نوجوانوں کو فنی تربیت فراہم کرنا اور خواتین کے لیے روزگار کے پائیدار مواقع پیدا کرنا ہے۔ ضلع گوادر میں بلوچستان رورل سپورٹ پروگرام (BRSP) کے ذریعے مستحق خاندانوں کی نشاندہی اور انہیں معاشی سرگرمیوں میں شامل کرنے کے اقدامات جاری ہیں۔

انہوں نے کہا کہ پروگرام کے تحت چھوٹے کاروبار کے قیام کے لیے ڈیڑھ لاکھ روپے تک بلاواپسی گرانٹ، جبکہ بڑے کاروباری منصوبوں کے لیے مقررہ شرائط کے مطابق مالی معاونت کی گنجائش موجود ہے۔ انہوں نے زور دیا کہ ہنرمندی اور مالی معاونت کے ذریعے مستحق افراد کو خود کفالت کی جانب گامزن کرنا اور مقامی معیشت کو فروغ دینا پروگرام کے بنیادی مقاصد میں شامل ہے۔

تقریب سے سید طاہر اور طارق نے بھی خطاب کیا۔

تصویر: بشکریہ ڈی جی پی آر بلوچستان