دکی: مضرِ صحت اشیاء کے خلاف کریک ڈاؤن، ایک بیکری اور دو کارخانے سیل، متعدد دکانداروں پر جرمانے

دکی: ڈپٹی کمشنر دکی فضل الرحمن کبدانی کی خصوصی ہدایت پر ضلعی انتظامیہ نے مضرِ صحت، غیر معیاری اور زائد المیعاد اشیائے خورد و نوش کی فروخت کے خلاف کارروائیاں تیز کر دی ہیں۔ اس سلسلے میں اسسٹنٹ کمشنر تحصیل تھل چوٹیالی عبدالسلام شاہوانی اور فوڈ انسپکٹر بخت محمد ناصر نے دکی شہر میں مختلف بیکریوں اور بیکری مصنوعات تیار کرنے والے کارخانوں کا اچانک اور تفصیلی معائنہ کیا۔

معائنے کے دوران متعدد بیکریوں اور کارخانوں میں صفائی کی ناقص صورتحال، حفظانِ صحت کے اصولوں کی خلاف ورزی، غیر معیاری خام مال کے استعمال اور زائد المیعاد و مضرِ صحت اشیاء کی موجودگی سمیت مختلف بے ضابطگیاں سامنے آئیں، جس پر انتظامیہ نے فوری کارروائی کرتے ہوئے ایک بیکری اور بیکری مصنوعات تیار کرنے والے دو کارخانوں کو سیل کر دیا، جبکہ متعدد دکانداروں اور بیکری مالکان پر جرمانے بھی عائد کیے گئے۔

اس موقع پر مختلف مراکز میں تیار ہونے والی اشیاء کے معیار، صفائی کے انتظامات، خام مال، مصنوعات کی تیاری و ذخیرہ کرنے کے طریقہ کار اور اشیاء کی میعاد کا تفصیلی جائزہ لیا گیا۔

اسسٹنٹ کمشنر عبدالسلام شاہوانی نے کہا کہ شہریوں کو معیاری، محفوظ اور صاف ستھری اشیائے خورد و نوش کی فراہمی ضلعی انتظامیہ کی اولین ذمہ داریوں میں شامل ہے، اور کسی بھی فرد یا کاروباری مرکز کو انسانی صحت سے کھیلنے کی ہرگز اجازت نہیں دی جائے گی۔ انہوں نے بیکری مالکان اور کارخانوں کے ذمہ داران کو ہدایت کی کہ صفائی کا معیار بہتر بنائیں، معیاری اور محفوظ خام مال کا استعمال یقینی بنائیں اور مصنوعات کی تیاری، ذخیرہ اور فروخت کے دوران تمام مقررہ اصولوں پر مکمل عملدرآمد کریں۔

فوڈ انسپکٹر بخت محمد ناصر نے کہا کہ عوامی صحت کے تحفظ پر کسی قسم کا سمجھوتہ نہیں کیا جا سکتا اور مضرِ صحت اشیاء کی تیاری یا فروخت میں ملوث عناصر کے خلاف قانون کے مطابق سخت کارروائی ہوگی۔ انہوں نے کہا کہ بیکریوں، ہوٹلوں، ریسٹورنٹس، جنرل اسٹورز اور دیگر مراکز کی نگرانی اور اچانک معائنوں کا سلسلہ جاری رہے گا۔ ضلعی انتظامیہ نے واضح کیا کہ خلاف ورزی کی نوعیت کے مطابق جرمانے، سیلنگ اور دیگر قانونی کارروائی عمل میں لائی جائے گی۔

تصویر: بشکریہ ڈی جی پی آر بلوچستان