خضدار میں عالمی یومِ آبادی پر محکمہ بہبودِ آبادی کی آگاہی تقریب، متوازن خاندان پر زور

خضدار: عالمی یومِ آبادی کے موقع پر محکمہ بہبودِ آبادی ضلع خضدار کے زیرِ اہتمام آگاہی تقریب منعقد ہوئی، جس میں خواتین کی بڑی تعداد نے شرکت کی۔ تقریب میں متوازن خاندان اور نوجوانوں کے روشن مستقبل پر زور دیا گیا۔

تقریب کا مقصد آبادی میں توازن، خاندانی منصوبہ بندی، ماں اور بچے کی صحت، نوجوان نسل کی ضروریات اور ان کے بہتر مستقبل کے حوالے سے شعور اجاگر کرنا تھا۔ تقریب سے ضلعی پاپولیشن ویلفیئر آفیسر ڈاکٹر خالدہ عمر، فیلڈ میڈیکل آفیسر ڈاکٹر لبنا علی، پاپولیشن ویلفیئر آفیسر سائرہ غلام دستگیر اور عبدالحلیم نے خطاب کیا۔

ترقی کا انحصار وسائل کے متوازن استعمال پر

ڈاکٹر خالدہ عمر نے کہا کہ کسی بھی ملک اور معاشرے کی ترقی کا انحصار صرف آبادی کی تعداد پر نہیں بلکہ دستیاب وسائل کے متوازن اور مؤثر استعمال پر ہوتا ہے۔ معاشی طور پر مستحکم خاندان ہی اپنے بچوں کو معیاری تعلیم، بہتر طبی سہولیات اور روشن مستقبل فراہم کر سکتے ہیں، جبکہ آبادی میں غیر متوازن اضافہ اکثر خاندانوں کو معاشی، تعلیمی اور صحت کے مسائل سے دوچار کر دیتا ہے۔

انہوں نے کہا کہ خاندانی منصوبہ بندی کا مقصد آبادی کو محدود کرنا نہیں بلکہ والدہ اور بچے کی صحت کا تحفظ، خاندان کی خوشحالی اور معاشرے کی پائیدار ترقی یقینی بنانا ہے، اور محکمہ بہبودِ آبادی اس مقصد کے لیے عوام کو مفت مشاورت اور مختلف طبی سہولیات بھی فراہم کر رہا ہے۔

ڈاکٹر لبنا علی، سائرہ غلام دستگیر اور عبدالحلیم نے کہا کہ عالمی یومِ آبادی منانے کا مقصد نوجوان نسل کی ضروریات، خوابوں اور بہتر مستقبل کے لیے ان کی رہنمائی اور معاونت کی اہمیت اجاگر کرنا ہے۔ نوجوان کسی بھی قوم کا قیمتی سرمایہ ہیں، اس لیے ان کی تعلیم، صحت، ذہنی نشوونما اور مثبت کردار سازی پر خصوصی توجہ ناگزیر ہے۔

مقررین نے والدین پر زور دیا کہ وہ ذمہ دارانہ خاندانی منصوبہ بندی اختیار کریں تاکہ بچوں کی بہتر تعلیم، صحت اور پرورش یقینی بنائی جا سکے۔ انہوں نے خواتین کو محکمہ بہبودِ آبادی کی سہولیات سے بھرپور استفادہ کرنے اور اپنے گھروں اور معاشرے میں آگاہی پھیلانے کی تلقین کی۔

تقریب کے اختتام پر شرکاء میں خاندانی منصوبہ بندی، ماں اور بچے کی صحت اور نوجوانوں کی فلاح و بہبود سے متعلق معلوماتی بروشرز تقسیم کیے گئے، اور عزم ظاہر کیا گیا کہ عوام میں شعور بیدار کرنے کے لیے ایسی آگاہی سرگرمیاں آئندہ بھی جاری رکھی جائیں گی۔

تصویر: بشکریہ ڈی جی پی آر بلوچستان