خاران ڈسٹرکٹ کوآرڈینیشن کمیٹی اجلاس: بی ایس ڈی آئی کے تحت واٹر سپلائی اسکیمیں سولر پر منتقل کرنے کی کوشش

خاران: ڈپٹی کمشنر خاران منیر احمد سومرو کی زیرِ صدارت ڈسٹرکٹ کوآرڈینیشن کمیٹی (DCC) کا اہم اجلاس منعقد ہوا، جس میں ضلع بھر میں جاری ترقیاتی منصوبوں، بین المحکمہ جاتی امور اور عوامی خدمات کی بہتری سے متعلق ایجنڈوں کا تفصیلی جائزہ لیا گیا۔

اجلاس میں ایڈیشنل ڈپٹی کمشنر عمر سنان جمالی، ایس پی صدورو لاشاری، ایکسیئن بلڈنگ قاضی بلال احمد، ایکسیئن پبلک ہیلتھ انجینئرنگ حاجی امان اللہ شاہوانی، اسسٹنٹ ڈائریکٹر لوکل گورنمنٹ عبدالرزاق کبدانی، ڈسٹرکٹ ہیلتھ آفیسر ڈاکٹر شیر احمد بلوچ، ڈسٹرکٹ ایجوکیشن آفیسر مختیار احمد ڈومکی، میڈیکل سپرنٹنڈنٹ ٹیچنگ اسپتال ڈاکٹر مشتاق مہیم اور ڈی ایس ایم پی پی ایچ آئی نور احمد کبدانی سمیت متعلقہ محکموں کے افسران نے شرکت کی۔

اجلاس میں بلوچستان اسپیشل ڈویلپمنٹ انیشی ایٹو (BSDI) کے تحت جاری ترقیاتی اسکیموں، واپڈا کے واجبات، ریکوری اور دیگر اہم انتظامی امور پر تبادلۂ خیال کیا گیا۔

ڈپٹی کمشنر منیر احمد سومرو نے کہا کہ BSDI کے تحت جاری منصوبے عوامی فلاح میں اہم کردار ادا کر رہے ہیں اور ان سے بڑی تعداد میں شہری مستفید ہو رہے ہیں، اور آئندہ بھی ایسی منصوبہ بندی کو ترجیح دی جائے گی جس سے زیادہ سے زیادہ عوام کو براہِ راست فائدہ پہنچے۔

انہوں نے کہا کہ صوبائی وزیر خزانہ میر شعیب جان نوشیروانی BSDI کے تحت محکمہ پبلک ہیلتھ انجینئرنگ کی تمام واٹر سپلائی اسکیموں کو شمسی توانائی (سولر سسٹم) پر منتقل کرنے کے لیے بھرپور کوششیں کر رہے ہیں، اور اسی وژن کے تحت صحت، تعلیم اور دیگر عوامی خدمات کے شعبوں میں جدید سہولیات اور ترقیاتی منصوبوں کے ذریعے عوام کو زیادہ سے زیادہ ریلیف دیا جائے گا۔

تصویر: بشکریہ ڈی جی پی آر بلوچستان