جیوانی کے زمینداروں کی ڈپٹی ڈائریکٹر زراعت سے ملاقات، بارانی زمینوں پر ٹیکس پر نظرثانی کا مطالبہ

گوادر: حکومتِ بلوچستان کی زراعت دوست پالیسی کے تحت زمینداروں کے مسائل کے حل، زرعی شعبے کے فروغ اور پائیدار زراعت کے لیے اقدامات کا سلسلہ جاری ہے۔ اسی سلسلے میں تحصیل جیوانی اور گردونواح کے زمینداروں کے ایک وفد نے ڈپٹی ڈائریکٹر زراعت توسیع مقبول احمد بلوچ سے ان کے دفتر میں ملاقات کی اور زمینداری سے متعلق مختلف مسائل پر تفصیلی تبادلہ خیال کیا۔

وفد نے بتایا کہ جیوانی اور گردونواح کی بیشتر زرعی زمینیں بارانی ہیں جہاں بارشوں کی صورت میں محدود پیمانے پر کاشت کاری ممکن ہوتی ہے، جبکہ سال کے بیشتر عرصے میں زمینیں غیر آباد رہتی ہیں۔ زمینداروں نے غیر آباد اور بارانی زمینوں پر عائد ٹیکس پر تحفظات کا اظہار کرتے ہوئے حکومتِ بلوچستان سے زمینی حقائق کو مدنظر رکھ کر اس پر نظرِ ثانی کی درخواست کی۔

ملاقات میں بینظیر کسان گرین کارڈ، زرعی سہولیات، زمینداروں کے دیگر مسائل اور علاقے میں زرعی سرگرمیوں کے فروغ سے متعلق امور بھی زیرِ بحث آئے۔ وفد نے زمینداروں کی مشکلات کے حل اور حکومتی زرعی سہولیات تک بہتر رسائی کے لیے مؤثر اقدامات کی ضرورت پر زور دیا۔

مقبول احمد بلوچ نے زمینداروں کے مسائل اور تجاویز غور سے سنیں اور یقین دلایا کہ ان کے جائز مسائل و تحفظات متعلقہ اعلیٰ حکام تک پہنچائے جائیں گے، جبکہ محکمہ زراعت دستیاب وسائل اور دائرہ اختیار کے اندر رہتے ہوئے ہر ممکن تعاون فراہم کرے گا۔ انہوں نے کہا کہ حکومتِ بلوچستان زراعت کے فروغ، زمینداروں کی سہولت اور جدید و پائیدار زرعی طریقوں کے لیے اقدامات کر رہی ہے، جن کے ثمرات مقامی زمینداروں تک پہنچانا محکمہ زراعت کی ترجیح ہے۔

تصویر: بشکریہ ڈی جی پی آر بلوچستان