جیوانی: اسسٹنٹ کمشنر طارق امام بلوچ کا آر ایچ سی کا دورہ، عملے کی حاضری اور ادویات کا جائزہ

گوادر: وزیر اعلیٰ بلوچستان میر سرفراز بگٹی کے وژن کے مطابق شہریوں کو ان کی دہلیز پر معیاری طبی سہولیات کی فراہمی یقینی بنانے کے لیے اسسٹنٹ کمشنر جیوانی طارق امام بلوچ نے رورل ہیلتھ سینٹر (RHC) جیوانی کا تفصیلی دورہ کیا۔

آر ایچ سی کے انچارج ڈاکٹر ادریس بلوچ نے ہسپتال کی مجموعی کارکردگی، دستیاب سہولیات، عملے کی حاضری، ادویات کی فراہمی، مریضوں کو دی جانے والی خدمات اور درپیش مسائل پر بریفنگ دی اور ان کے حل کے لیے درکار اقدامات سے آگاہ کیا۔

اسسٹنٹ کمشنر نے او پی ڈی، ایمرجنسی، مردانہ و خواتین وارڈز، لیبارٹری، ایم این سی ایچ سینٹر، نیوٹریشن سینٹر، فارمیسی، ریکارڈ روم اور دیگر شعبوں کا معائنہ کیا اور صفائی، ادویات کی دستیابی اور مجموعی انتظامات کا جائزہ لیا۔ انہوں نے ڈاکٹروں اور عملے کی حاضری چیک کی اور ہدایت کی کہ تمام ملازمین اوقاتِ کار کی سختی سے پابندی کریں، مریضوں سے خوش اخلاقی سے پیش آئیں اور بلا تعطل طبی خدمات یقینی بنائیں۔ انہوں نے واضح کیا کہ فرائض میں غفلت یا کوتاہی برداشت نہیں کی جائے گی۔

بعد ازاں انہوں نے فارمیسی اسٹور میں ادویات کے ذخیرے، ریکارڈ اور دستیابی کا جائزہ لیا اور ہدایت کی کہ لائف سیونگ ڈرگز، ایمرجنسی ادویات اور دیگر ضروری طبی سامان ہر وقت وافر مقدار میں دستیاب رکھا جائے۔

طارق امام بلوچ نے کہا کہ وزیر اعلیٰ کی ہدایات کے مطابق ضلع بھر کے سرکاری صحت مراکز کی مسلسل نگرانی جاری رہے گی اور عوام کو معیاری، بروقت اور بلا امتیاز طبی سہولیات کی فراہمی حکومت بلوچستان کی اولین ترجیح ہے۔ انہوں نے ہسپتال کے مسائل کے حل کے لیے مربوط اقدامات کی ہدایت بھی کی۔

تصویر: بشکریہ ڈی جی پی آر بلوچستان