جھل مگسی: سرکٹ ہاؤس گنداواہ میں جشنِ آزادی تقریب، ڈی سی سید رحمت اللہ شاہ نے شجرکاری مہم کا افتتاح کیا

گنداواہ: ضلعی ہیڈ کوارٹر گنداواہ کے سرکٹ ہاؤس میں جشنِ آزادی کی صبح پروقار تقریب منعقد ہوئی، جس میں ڈپٹی کمشنر جھل مگسی سید رحمت اللہ شاہ، لیفٹیننٹ کرنل عاصم خان اور ایس پی جھل مگسی رحمت اللہ درانی نے خصوصی طور پر شرکت کی۔ تقریب میں مختلف محکموں کے ضلعی افسران، سول سوسائٹی، صحافیوں، طلبہ، اساتذہ اور جوانوں نے شرکت کی۔

تقریب میں قومی پرچم لہرایا گیا اور جھل مگسی پولیس کے چاق و چوبند دستے نے سلامی پیش کی۔ پولیس افسران و جوانوں نے پاکستان زندہ باد کے نعرے بلند کیے۔ بعد ازاں ڈپٹی کمشنر سید رحمت اللہ شاہ اور دیگر افسران نے سرکٹ ہاؤس گنداواہ میں پودے لگا کر شجرکاری مہم کا افتتاح کیا۔

اس موقع پر ریلی کا اہتمام بھی کیا گیا، جبکہ ڈپٹی کمشنر سید رحمت اللہ شاہ، ایس پی رحمت اللہ درانی اور دیگر افسران نے ڈسٹرکٹ ہیڈ کوارٹر ہسپتال گنداواہ اور جوڈیشل لاک اپ گنداواہ کا دورہ کیا، مریضوں کی تیمارداری کی، قیدیوں کی خیریت دریافت کی اور ان میں مٹھائیاں تقسیم کیں۔ وطن کی سلامتی، استحکام، ترقی اور خوشحالی کے لیے خصوصی دعا کی گئی، اور افسران نے ملک و قوم کی خدمت، امن و امان کے قیام اور شہریوں کے جان و مال کے تحفظ کے لیے اپنی ذمہ داریاں جاری رکھنے کا عزم کیا۔

تصویر: بشکریہ ڈی جی پی آر بلوچستان