جامعہ گوادر کے کیمسٹری کے طلبہ کا انڈس ہسپتال گوادر کا مطالعاتی دورہ، کلینیکل لیبارٹری کی عملی آگاہی

گوادر: جامعہ گوادر کے شعبہ کیمسٹری کے طلبہ نے طبی تشخیصی عمل اور کلینیکل لیبارٹری کے طریقہ کار سے عملی واقفیت کے لیے انڈس ہسپتال اینڈ ہیلتھ نیٹ ورک کے زیر انتظام جی ڈی اے پاک چین فرینڈشپ ہسپتال کا مطالعاتی دورہ کیا۔

یہ دورہ فیکلٹی آف سائنس اینڈ انجینئرنگ کے ڈین ڈاکٹر محب اللہ کی ہدایات پر شعبہ کیمسٹری کے چیئرپرسن وسیم حمید نے کرایا۔ طلبہ کے ہمراہ اسسٹنٹ پروفیسر ڈاکٹر عبداللہ اور فیکلٹی ممبر محترمہ شلی انور بھی موجود تھیں۔

دورے کے دوران طلبہ کو ہسپتال کی لیبارٹری سہولیات، کلینیکل لیبارٹری سروسز اور مریضوں کی تشخیص میں ان کے کردار پر بریفنگ دی گئی، اور سی بی سی، بلڈ گلوکوز، سیرم الیکٹرولائٹس، گردوں اور جگر کے افعال کے ٹیسٹ، لپڈ پروفائل، یورین انیلیسس اور دیگر بائیوکیمیکل و ہیماٹولوجیکل ٹیسٹوں سے آگاہ کیا گیا۔ طلبہ نے سیمپل ہینڈلنگ، لیبارٹری تجزیے، کوالٹی کنٹرول اور درست تشخیصی نتائج کی اہمیت کے بارے میں عملی معلومات حاصل کیں۔

ہسپتال انتظامیہ نے کیمسٹری کے فارغ التحصیل طلبہ کے لیے کلینیکل اور ڈائیگناسٹک لیبارٹریز میں کیریئر کے مواقع پر روشنی ڈالی، جبکہ ممکنہ انٹرن شپ، عملی تربیت اور جامعہ گوادر اور انڈس ہسپتال اینڈ ہیلتھ نیٹ ورک کے درمیان مستقبل میں تعاون پر بھی تبادلہ خیال ہوا۔ جامعہ کی انتظامیہ اور شعبہ کیمسٹری نے رہنمائی اور میزبانی پر انڈس ہسپتال اینڈ ہیلتھ نیٹ ورک گوادر اور ڈاکٹر عدنان کا شکریہ ادا کیا۔

تصویر: بشکریہ ڈی جی پی آر بلوچستان