بارکھان: ڈپٹی کمشنر سعید الرحمٰن کاکڑ کی زیر صدارت انسداد پولیو کمیٹی اجلاس، 21 تا 24 ستمبر مہم کی تیاریاں

بارکھان: ڈسٹرکٹ پولیو ایریڈیکیشن کمیٹی (DPEC) کا اجلاس ڈپٹی کمشنر بارکھان سعید الرحمٰن کاکڑ کی زیرِ صدارت منعقد ہوا، جس میں 21 سے 24 ستمبر 2026 تک جاری رہنے والی انسدادِ پولیو مہم کی تیاریوں اور انتظامات کا تفصیلی جائزہ لیا گیا۔

اجلاس میں ڈسٹرکٹ ہیلتھ آفیسر (DHO)، ڈسٹرکٹ سپورٹ آفیسر (DSO)، ڈپٹی ڈسٹرکٹ ہیلتھ آفیسر (DDHO) اور تمام یونین کونسل میڈیکل آفیسرز (UCMOs) سمیت متعلقہ افسران نے شرکت کی۔ پولیو ٹیموں کی تشکیل، مائیکرو پلان، فیلڈ مانیٹرنگ، سکیورٹی انتظامات اور پانچ سال سے کم عمر تمام بچوں تک ویکسین کی رسائی یقینی بنانے کے اقدامات کا جائزہ لیا گیا۔

ڈپٹی کمشنر نے ہدایت کی کہ مہم کے دوران پانچ سال سے کم عمر کوئی بھی بچہ پولیو کے قطروں سے محروم نہ رہے، اور پولیو ٹیموں کی مؤثر نگرانی، باہمی رابطے اور مہم کے اہداف کے حصول پر زور دیا۔ انہوں نے کہا کہ پولیو کا مکمل خاتمہ ہم سب کی مشترکہ قومی ذمہ داری ہے۔

اجلاس میں والدین سے اپیل کی گئی کہ وہ انسدادِ پولیو ٹیموں سے بھرپور تعاون کریں اور اپنے پانچ سال سے کم عمر بچوں کو پولیو سے بچاؤ کے قطرے ضرور پلوائیں۔

تصویر: بشکریہ ڈی جی پی آر بلوچستان