ٹرانسفر ہونے والے کمشنر کوئٹہ ڈویژن شاہزیب خان کاکڑ کے اعزاز میں کمشنر آفس میں الوداعی تقریب

کوئٹہ: کمشنر آفس کوئٹہ میں ٹرانسفر ہونے والے کمشنر کوئٹہ ڈویژن شاہزیب خان کاکڑ کے اعزاز میں پروقار الوداعی تقریب منعقد ہوئی، جس میں ایڈیشنل کمشنر کوئٹہ ڈویژن آغا سمیع اللہ، اسسٹنٹ کمشنر ریونیو کوئٹہ سید کلیم اللہ، سیکرٹری آر ٹی اے کوئٹہ نعمت اللہ، ڈائریکٹر آئی ٹی محب اللہ، سپرنٹنڈنٹس، سرکاری افسران اور کمشنر آفس کے افسران و اہلکاروں نے شرکت کی۔

شاہزیب خان کاکڑ نے خطاب میں کہا کہ کوئٹہ ڈویژن میں تعیناتی کے دوران انہیں افسران اور عملے کا بھرپور تعاون حاصل رہا جس پر وہ سب کے شکر گزار ہیں۔ انہوں نے کہا کہ سرکاری فرائض میں ٹیم ورک اور باہمی تعاون بنیادی اہمیت رکھتے ہیں، اور اپنے دور میں انہوں نے عوامی مسائل کے حل، انتظامی بہتری اور حکومتی اقدامات پر مؤثر عملدرآمد کے لیے بھرپور کوششیں کیں۔ انہوں نے افسران و اہلکاروں پر زور دیا کہ وہ آئندہ بھی محنت، دیانتداری اور عوامی خدمت کے جذبے سے کام کرتے رہیں۔

شرکاء نے شاہزیب خان کاکڑ کی خدمات کو سراہا اور ان کی آئندہ ذمہ داریوں میں کامیابی کے لیے دعا کی۔ تقریب کے اختتام پر انہوں نے تمام افسران اور اہلکاروں سے فرداً فرداً ہاتھ بھی ملایا۔

تصویر: بشکریہ ڈی جی پی آر بلوچستان