بلوچی فلموں کے معروف فنکار سرفراز احمد کو ڈپٹی کمشنر گوادر نقیب اللہ کاکڑ کی جانب سے خصوصی اعزاز

گوادر: بلوچی زبان، فن اور ثقافت کے فروغ کے لیے نمایاں خدمات انجام دینے والے معروف بلوچی فنکار سرفراز احمد کو ڈپٹی کمشنر گوادر نقیب اللہ کاکڑ کی جانب سے ان کی فنی و ادبی خدمات کے اعتراف میں خصوصی اعزاز سے نوازا گیا۔

سرفراز احمد طویل عرصے سے بلوچی زبان کے فروغ اور ثقافتی ورثے کی ترویج میں نمایاں کردار ادا کر رہے ہیں۔ انہوں نے متعدد بلوچی فلموں میں مختلف اور یادگار کردار ادا کر کے مقامی فن، زبان اور ثقافتی اقدار کو اجاگر کیا اور بلوچی زبان اور مقامی ثقافت کو وسیع سطح پر متعارف کرایا ہے۔

ڈپٹی کمشنر نقیب اللہ کاکڑ نے کہا کہ زبانیں صرف اظہار کا ذریعہ نہیں بلکہ کسی قوم کی تاریخ، تہذیب، روایات اور اجتماعی شناخت کی آئینہ دار ہوتی ہیں۔ بلوچی زبان و ثقافت کے لیے فنکاروں، ادیبوں اور اہلِ قلم کی خدمات ہمارے ثقافتی ورثے کا قیمتی سرمایہ ہیں جن کی حوصلہ افزائی معاشرے کی اجتماعی ذمہ داری ہے۔

انہوں نے کہا کہ سرفراز احمد کی فنی خدمات کسی ایک اعزاز کی محتاج نہیں، تاہم ان کا اعتراف نئی نسل کے فنکاروں کے لیے مثبت پیغام ہے۔ ڈپٹی کمشنر نے عزم ظاہر کیا کہ بلوچی زبان، مقامی فنون اور ثقافتی ورثے کے فروغ کے لیے تعمیری سرگرمیوں کی حوصلہ افزائی جاری رکھی جائے گی تاکہ گوادر سمیت بلوچستان کی منفرد تہذیبی شناخت مزید اجاگر ہو۔

سرفراز احمد نے اعزاز پر شکریہ ادا کرتے ہوئے کہا کہ فنکار کی اصل پذیرائی اس وقت ہوتی ہے جب اس کے فن اور خدمات کو قدر کی نگاہ سے دیکھا جائے۔ انہوں نے اس اعزاز کو اپنے لیے حوصلہ افزائی قرار دیا اور بلوچی زبان و ثقافت کے لیے اپنی فنی خدمات جاری رکھنے کا عزم ظاہر کیا۔

تصویر: بشکریہ ڈی جی پی آر بلوچستان